Aksioni i të mërkurës, ku u arrestuan disa zyrtarë nga Ministria e Bujqësisë, ka ndarë opinionin e gjerë në dy lloj grupacione: njëri që beson se ky aksion tregon forcën e shtetit për të arrestuar këdo që keqpërdor buxhetin e shtetit, dhe tjetri që beson se ky aksion më tepër është i formës së spektaklit dhe s’do të prodhojë asgjë ndryshe, nga aksionet e tilla të mëhershme.
Unë, më tepër bëj pjesë tek grupi i dytë, edhe nëse politika në këtë rast qeveria aktuale ka vullnet për të çuar deri në fund drejtësinë, ky aksion s’do të prodhojë atë që do të duhet: të dëshmonte forcën e shtetit përballë krimit, korrupsionit.
Ka ndodhur shumë raste kur aksionet e tilla më tepër kanë prodhuar efekte emocionale, por jo konkrete. Policia mund ta kryejë punën shumë mirë, mirëpo derisa nuk ka Vetting në prokurori, në sistemin e tërësishëm gjyqësor, është e kot të mendohet se do të luftohet krimi, korrupsionin. Policia le të arrestojë tërë ditën, kur natën gjykata i liron. Gjarpri duhet goditur në kokë, jo në këmbë sa për ta trazuar edhe më shumë.
U konfiskuan 400 mijë euro, të cilat nën optikën e Xhavit Halitit nuk janë asgjë, pasi “të gjithë i kemi kah 2-3 milionë”, për të relativizuar peshën e parave, të milionave.
Mbase, Xhavitit dhe shokëve të tij në ministri të ndryshme, 2 milionë euro iu duken asgjë, janë mbi 100 mijë qytetarë të Kosovës që jetojnë me nga 1 euro në ditë. Ata nuk jetojnë se janë të pazot, por nuk janë hajna, nuk vjedhin djersën e akujt, nën kujtesën e një slogani “ne nuk jemi të varfër, ne jemi të vjedhur”. Mendësia e Xhavitit dhe sojit të tyre, e kanë sjellë gjendjen këtu, ku çdo njeriut që i jepet mundësia për të vjedhur e bën, është bërë kulturë tashmë kjo gjë. Nuk luftohet krimi, korrupsioni me aksione të tilla, me gjykatës dhe prokurorë që emërohen përmes telefonave, me atributet e vetme: të jenë servile, dhe të dinë të konkurrojnë.
S’kam besim fare në luftimin e korrupsionit pa bërë reforma të thella në drejtësi, ku të zhduket një herë e përgjithmonë ky sistem i kalbu që prodhon vetëm spektakle. Mos të harrojmë se të gjithë këto keqpërdorime s’do të mund të ndodhnin pa pasur njohuri edhe “të mëdhenjtë”, e të cilët kanë mbetur të paprekur, me spektakli që do i spastrojë kokat e krimit nga hajnia e madhe që është bërë në ministrinë e bujqësisë me vite të tëra.
