Ashtu siç edhe pritej, Parlamenti Evropian ka votuar sot pro liberalizimit të vizave për qytetarët e Kosovës. Me shumicë votash, evropianët i kanë dhënë dritën e gjelbër shtetasve të Kosovës, për të udhëtuar në zonën Shengen, kështu që nga 1 janari 2024 qytetarët e Kosovës mund të udhëtojnë pa viza. Realisht, që në vitin 2010 është premtuar për liberalizim të vizave, ndonëse një gjë e tillë ende s`ka ndodhur, por është afër të ndodhë.
Deri tani nga shumë politikanë ishte premtuar liberalizimi i vizave duke e kthyer këtë në çështje votash. Hashimi kishte premtuar që në 2010 për të vazhduar në çdo palë zgjedhje. Ramushi me fudullëkun e tij deklaronte se liberalizimi ka ndodhur, Isa gënjente se shumë shpejt do të ndodhë. E të gjithë këta nuk bënin asgjë për të ndodhur liberalizimi, përkundrazi me kapjen e shtetit dhe nivelin e lartë të korrupsionit e bënin më të vështirë.
Vet presidenti francez Macron, që ishte edhe përfaqësuesi i fundit i shtetit që ishte kundër për shkak të mungesës në luftimin e krimit dhe korrupsionit. Qeveria aktuale ka bërë hapa të rëndësishëm në këtë drejtim, gjë që e konfirmoi edhe ministrja suedeze për Migracionin, Maria Malmer Stenergard, vendi i së cilës udhëheq presidencën e BE. “Kosova ka bërë përpjekje të mëdha për të përmirësuar menaxhimin e sigurisë dhe migracionit dhe për të harmonizuar politikën e saj të vizave me atë të BE-së" theksoi ndër të tjera zonja Stenergard.
Pra, është dashur të luftohet krimi dhe korrupsioni, të krijohet besim te vendet e BE-së për të ndodhur liberalizimi. Natyrisht se ka pasur edhe arsye politike, megjithatë edhe niveli i brendshëm i korrupsionit e ka penguar këtë proces shumë. Andaj, është meritë e qytetarëve të Kosovës dhe e kësaj qeverie, sa për Hashimin, Ramushin dhe Isën, jo vetëm pa viza, por edhe pa atdhe do kishim mbetur.
