Ismail Kadare thotë se “Nuk e kuptoj ku është problemi me marrëveshjen për emigrantët” që kryeministri i Shqipërisë, Rama, dhe kryeministrja italiane, Meloni, nënshkruan para tri ditësh. Kështu shkruan gazeta “La Stampa”! Madje thotë se “nuk i interesojnë lojërat për pushtet”! Ndërkaq shkrimtari i oborrit thotë gjithashtu se “nuk i kuptoj ata që kundërshtojnë këtë marrëveshje”!
Pra shkrimtari Ismail Kadare nuk heq dorë nga marrëdhënia e ngushtë me pushtetet autoritare dhe totalitare. Ai, edhe në këtë rast, iu kundërvu qëndrimeve të opozitës ndaj marrëveshjes Rama-Meloni dhe mbrojti autokratin më të egër në historinë e shtetit shqiptar, pas diktatorit Hoxha. E mbrojti kleptokratin Rama, sepse Kadare nuk di ndryshe, nuk mendon dot ndryshe, nuk bën dot ndryshe!
Kundërshtimin e opozitës e ka emërtuar “lojë politike”! Ndërsa marrëveshjen unikale të Edi Ramës e konsideron si “humane”, pra jo një lojë të tij politike për të zgjatur pafundësisht sundimin e tij mizor në majën e pushtetit të Tiranës me ndihmën e Melonëve majtas e djathtas! Ndërkaq të gjitha “argumentet” që Ismail Kadare ka përdorur për gazetën italiane “La Skampa” janë përsëritje papallgaçe e propagandës së Edi Ramës.
Për Kadarenë, Edi Rama dhe llumi i tij tashmë prapa hekurave e në pritje për atje, përbëjnë “progresiven”, “të mirën” e këtij vendi. Ndërsa ne që duam miqësi me Italinë e këdo tjetër, duke këmbngulur në interesat tona, qenkemi “e keqja”, “regresi”! Mendja e mbrapshtë e Kadaresë është shumë krijuese edhe në deklarata të tjera përçarëse!
Kadare me atë deklaratë vetëm se i hodhi benzinë zjarrit të dasive në vendin tonë! Dhe shkrimtarët e mëdhenj kurrë nuk angazhohen në ndarje e përçarje të kombit të tyre! Edhe se ai shkruan me talent të pazakontë, mbetet ende në moshën 87 vjeçare një përçarës i madh i shqiptarëve, në “miq e armiq” të Italisë, në “miq dhe armiq” të krishterimit, “në miq dhe armiq” të diktaturave! Në këtë moshë Marksi e Lenini do ta kishin zbutur doktrinën e tyre. Ndërsa Kadare ende vazhdon të mbrojë oborret e diktaturave si në kohën e qoftë largut!
Sinqerisht kisha një dilemë deri sot për atë që përfaqëson Kadare, duke anuar nga pozitivja. Por falsiteti i tij të zhgënjen. Ai e di më mirë se unë se cilat janë rreziqet e asaj marrëveshjeje dhe sërishmi e mbron atë. Sepse vazhdon të mbështetë mbrapshtinë shqiptare. Ndërkohë që në këtë rast u jap përgjigje shumë pyetjeve që kisha atë natë tetori, kur Macron e dha Kadaresë dekoratën më të lartë franceze! Megjithatë përçarja që na bën Kadare nuk është mision, është vesi i tij!
