Kryeministri i Kosovës, Albin Kurti gjatë ditës së djeshme ka mbajtur fjalim në Parlamentin Evropian në Belgjikë.
Gjatë këtij fjalimi, Kurti ka folur për rifillimin e dialogut me Serbinë dhe kërkesat e tij karshi shtetit serb.
Ai u shpreh se çështja e parë e dialogut është zbardhja e fatit të të pagjeturve , nëse nuk ka ndryshim në këtë çështje, atëherë vazhdimi i bisedimeve bëhet i vështirë.
Njohësi i çështje politike, Skënder Kapiti në një prononcim për gazetën “Bota sot” ka komentuar fjalimin e kryeministrit Albin Kurti në Parlamentin Evropian dhe qëndrimet e tij karshi dialogut me Serbinë.
Kapiti u shpreh se me ardhjen e Kurtit në krye të qeverisë së Kosovës, tani presidenti serb Vuçiq dhe ndërmjetësuesit e tjerë evropian nuk kanë përballë politikanë të korruptuar, injorantë e as politikan që pranon ndarjen e Kosovës (rasti i ish-presidentit Hashim Thaçi).
“Tani pas zgjedhjeve të 14 shkurtit 2021 në Kosovë, Serbia dhe Vuçiqi por edhe ndërmjetësuesit evropianë për normalizimin e marrëdhënieve Kosovë -Serbi nuk kanë më përballë individë interesaxhinjsh, as partiakësh, as politikanë miopë e injorantë dhe as të korruptuar që për interesa personale, ishin gati të bënin deri edhe pazare me trojet e Dardanisë.
Është fakt që ai soj-sorollopi politikanësh tani i përkasin të shkuarës si p.sh. Hashim Thaçi si i vetmi politikan e ndoshta edhe si i vetmi shqiptar i Kosovës që kishte pranuar ndarjen e Kosovës”, deklaroi ai.
Tutje, analisti komentoi edhe kërkesën e parë të Kurtit ndaj Serbisë, siç është zbardhja e fatit të të pagjeturve. Ai e vlerëson këtë si një kërkesë largpamëse nga Kurti, e cila e vë Serbinë para përgjegjësisë si shtet gjenocidist.
“Albin Kurti për dialogun Kosovë-Serbi, si çështje të parë për të zgjidhur në bisedimet Kosovë-Serbi kërkon dhe përmend fatin e të pagjeturve, kërkesë kjo e cila e vë Serbinë para përgjegjësisë si shtet gjenocidist. Këtë kryeministri largpamës Albin Kurti e kërkon pra jo pa qëllim”, theksoi Kapiti
Ai paralajmëroi se kjo nuk do të jetë kërkesa e vetme e Kurtit ndaj Serbisë, duke përmendur edhe kërkesat e tjera të cilat do t’i injoronin të gjitha intrigat e planet djallëzore të Serbisë për ndarjen e Kosovës
“Kjo kërkesë e tij dhe me siguri edhe të tjerat që do të pasojnë pas saj, si dënimi i gjenocidit serb, dëmshpërblimi për krimet dhe dëmet materiale të luftës do ta vënë Serbinë para përgjegjësisë dhe para llogaridhënies për krimet e tmerrshme dhe për gjenocidin që ajo ka ushtruar kundër shqiptarëve.
Gjë e cila do të zhvlerësonte dhe do të injoronte nga agjenda të gjitha intrigat e planet djallëzore të Serbisë për minishengenin, për bashkësitë e komunave serbe dhe atë për ndarjen e Kosovës, plan të cilin fatkeqësisht e kanë pranuar dhe mbështetur edhe ish-Presidenti i Kosovës Hashim Thaçi por edhe kryeministri i Shqipërisë Edi Rama i cili, pa pyetur aspak Prishtinën mori edhe flamurin e pajtimit shqiptaro-serb duke cituar edhe vargje të Ivo Andriqit”, nënvizoi analisti.
Kapiti konsideron se është fat i madh për Kosovës që ka një kryeministër si Kurti dhe një presidente si Osmani. Madje, ai tha se nëse këta do të ishin më herët në krye të shtetit nuk do të kishte pasur marrëveshje inferioriteti dhe të dëmshme për Kosovën siç kanë bërë paraardhësit e tyre.
“Pra është fat i madh për Kosovën që me Albin Kurtin kryeministër dhe me Vjosa Osmanin presidente, tani Kosovës po i kthehet autoriteti, prestigji dhe imazhi si një shtet sovran dhe i pavarur. Nëse do të kishin qenë më herët këta të dy në krye të shtetit, nuk do të kishte pasur marrëveshje inferioriteti dhe të dëmshme për Kosovën siç kanë bërë paraardhësit. Albini dhe Vjosa do të mbrojnë parimin e madh të reciprocitetit me të gjitha shtetet e tjera, dhe sidomos përballë Serbisë”, potencoi ai.
Në fund, analisti Kapiti radhiti kushtet të cilat Kurti duhet t’ia vë si parakusht Serbisë, në mënyrë që e largojnë mundësinë e ndarjes së Kosovës.
Për normalizimin e marrëdhënieve Kosovë-Serbi si parakushte të dorës së parë është njohja nga Serbia për gjenocidin e saj, gjetjen e të humburve dhe dëmshpërblimin, kushte të cilat as që e mundësojnë ne diskutim ndonjë plan apo tentativë për ndarje të Kosovës./BS
