Profesori për Studime Evropiane në Universitetin Johns Hopkins në SHBA, David Kanin, ka komentuar ndalimet e shtetasve të Kosovës nga policia serbe në kufirin me Kroacinë.
Ai ka thënë se nuk ka dyshime se ndalimet dhe arrestimet e Serbisë, erdhën si përgjigje ndaj votës për anëtarësimin e Kosovës në Këshillin e Evropës.
“Nuk ka dyshim se veprimet e fundit të Serbisë, janë përgjigje ndaj votës për anëtarësimin e Kosovës në Këshillin e Evropës. Gjithashtu, nuk ka dyshim se ato futen në serinë e pafundme të provokimeve dhe ofendimeve të bëra nga Prishtina dhe Beogradi kundër njëra-tjetrës si pjesë e konfliktit për statusin e Kosovës”, ka deklaruar Kanin në një prononcim për gazetën “Bota sot”.
Policia serbe arrestoi edhe zëvendësdrejtorin e Policisë së Kosovës Dejan Jankoviç, i cili u lirua vetëm pas reagime të shumta ndaj Serbisë.
Sipas profesorit amerikan, fakti që Jankoviç është nga Shtërpca, është i rëndësishëm, ndaj edhe u arrestua, pasi Serbia e sheh si tradhtar, për shkak të përpjekjeve të tij për integrimin e serbëve në veri.
“Dejan Jankoviç është një objektiv i natyrshëm i zemërimit serb -- një serb nga Kosova që po bashkëpunon me përpjekjet për të integruar serbët e atij vendi në një shtet funksional. Fakti që ai është nga Shtërpca gjithashtu është i rëndësishëm. Shtrirja e Beogradit në jug të Ibrit është e kufizuar dhe mundësia për të ndaluar dhe ngacmuar dikë prej andej, të cilin Serbia e sheh si tradhtar, duket se ka qenë shumë e mirë për t'u lënë pas dore”, ka theksuar më tej David Kanin.
Ai vlerëson se ngjarjet e fundit, kanë shtuar zhgënjimin ndërkombëtar, megjithëse sipas tij, nuk do të ketë ndonjë veprim të rëndësishëm ndërkombëtar.
“Zëdhënësit e SHBA-së dhe Evropës po shprehin "shqetësim", por nuk ka gjasa të ndodhë ndonjë veprim i rëndësishëm ndërkombëtar. Ngjarjet e fundit thjesht shtojnë zhgënjimin ndërkombëtar me incidentin e Banjskës, ndalimin e dinarit nga Prishtina dhe dështimin e vazhdueshëm të përpjekjeve për të imponuar të ashtuquajturën Marrëveshje të Ohrit dhe dialogun e ngecur prej kohësh të udhëhequr nga BE-ja që supozohej të fillonte. Shtimi i kushteve në lidhje me ngërçin në procesin tashmë të ngarkuar të pranimit në BE të të dy vendeve ka pasur pak ndikim në Beograd dhe në Prishtinë. Ky ka të ngjarë të jetë rezultati i çfarëdo retorike apo masash politiko-ligjore që do të dalin nga kryeqytetet perëndimore në lidhje me ndalimin e Jankoviç dhe kolegëve të tij dhe çfarëdo tjetër që Beogradi apo Prishtina thonë apo bëjnë gjatë ditëve në vijim”, deklaruar eksperti për “Bota sot”.
Kryeministri Albin Kurti, e konsideroi si hakmarrje të Serbisë ndalimin e udhëtarëve të mërkurën në pikëkalimet kufitare në Serbi. Kjo, sipas Kurtit, është paralajmëruar edhe nga presidenti serb, Aleksandër Vuçiq.
Ai ka thënë se Serbia u hakmor kësisoj një ditë pasi Kosova ka arritur të sigurojë votat e mjaftueshme nga delegatët e shteteve anëtare të Këshillit të Evropës, duke shtuar se qindra persona janë privuar nga ushqimi dhe mjekimi.
“Ata janë ndaluar si rezultat i një konference për media të cilën e pati të shtunën që shkoi presidenti i Serbisë ku ai tha që në javën që vjen Serbia kudo që ushtron pushtet dhe kontroll efektiv, do të fillojë që të hakmerret. Andaj, edhe ajo çfarë po ndodh në këtë javë është paralajmëruar të shtunën që shkoi kur presidenti i Serbisë vizitoi njësitet ushtarake ‘Kobra’ në ditëlindjen e tyre – një njësit të cilën ne e patëm akuzuar në mes të qershorit të vitit të kaluar që i ka rrëmbyer tre policët tanë në veri të Kosovës. Pikërisht në ditëlindjen e Njësitit Special Ushtarak, i cili i kishte rrëmbyer policët tanë, presidenti i Serbisë e paralajmëroi këtë përndjekje të të tjerëve të cilët ai i konsideron të padëshirueshëm, duke filluar prej shqiptarëve të Kosovës e atyre ne Luginë e deri të serbet në Kosovë, të cilët janë integruar në institucionet tona. Duket që arrestimi masiv i cili është bërë – me ç’rast qindra qytetarë civilë janë lënë pa medikamente, pa ushqim pa ujë për pothuajse një ditë të plotë – është rezultat i suksesit të Kosovës në Asamblenë Parlamentar në KiE dhe si një hakmarrje intensive u bë kjo përndjekje e ky ndalim në masë”, ka thënë Kurti.
