Një 19-vjeçare u plagos në një aksident rrugor mesditën e kësaj të hëne në Korçë. Ngjarja ndodhi në lagjen numër 17, pranë terminalit të autobusëve. E reja ishte duke kaluar tek vijat e bardha kur u përplas nga një makinë tip “Mini Cooper” që drejtohej nga një 27-vjeçar.
Nga goditja e fortë, 19-vjeçarja mori plagë të shumta në trup. Ajo u dërgua me urgjencë drejt spitalit ku ndodhet jashtë rrezikut për jetë. Shkak për aksidentin dyshohet se u bë shpejtësia e lartë, ndërsa u shoqërua në polici shoferi.
Edhe në Berat, një çift bashkëshortësh u plagos në një aksident rrugor. Ata ishin duke lëvizur me një motor por humbën kontrollin dhe u përplasën me një makinë tip “Benz”, që ishte parkuar në anë të rrugës.
Ndërkohë në Cërrik, një i moshuar u transportua në gjendje të rëndë drejt spitalit. Ai po lëvizte me një motor në afërsi të fshatit Mollas, kur u përplas me një makinë tip ”BMW”.
