Demokrati Fatbardh Kadilli është një ndër të vetmit zëra që ka dalë kundër të dyve Kuvendeve të organizuara nga Sali Berisha dhe Lulzim Basha.
Ai ka reaguar për herë të parë pas protestës së dhunshme që u organizua dje në selinë blu dhe ka ripërsëritur qëndrimin e tij se vetëm largimi i të dyve shpëton PD-në.
“Dua të rithem edhe një herë, ndoshta për të një mijtën herë: E VETMJA mundësi që PD të mbijetojë është të largojë si Bashën dhe Berishën nga drejtimi.
Basha nuk ka të ardhme politike si udhëheqës!
Berisha nuk mund të jetë e ardhmja! Dje, mbaroi edhe projekti i Berishës për të rithemeluar PD-në.
Dje, unë ndjeva një keqardhje të thellë dhe të hidhur në shpirtin dhe në mendjen time për demorkatët e thjeshtë të rrahur, të përhumbur, të pashpresë.
Është koha që demokratët të mos e shohin të ardhmen si një dënim ose me Bashën, ose me Berishën, por si vullnet për të ndërtuar një parti demokratike, me konkurencë të ndershme dhe vlera morale. Vetëm një parti e tillë do tërheqë pas vetes shumicën e shqiptarëve në zgjedhjet e ardhshme. Çdo projekt tjetër, çdo iluzion tjetër do jetë disfata e e rradhës.”, shkruan Kadilli.
