Juristi i njohur, Kreshnik Spahiu ka deklaruar se ata që thonë se opozitën duhet ta drejtojë Berisha, i zgjasin jetën Edi Ramës, pasi ish-kryeministri ka dy vite që nuk mbledh dot njerëz për protestë. Spahiu komentoi dje në një media lidhur me Kuvendin e “Rithemelimit” të drejtuar nga Sali Berisha, teksa theksoi se ky i fundit të ketë një fund të trishtë politik nëse nuk tërhiqet.
“Berisha është vetmitar, ka dy vite që nuk realizon dot një protestë. Dolën më shumë njerëz në protestë për Palestinën, se sa për Berishën.
Berisha fatkeqësisht do ketë një fund të trishtë politik nëse nuk tërhiqet. Fundi i tij nuk do jetë vetëm personal. Fundi i tij personal është bërë jo vetëm tragjik, por edhe komik. Problemi është të shpëtohen interesat e elektoratit që besojnë te Berishizmi. Kanë besuar me ndershmëri dhe ende besojnë, por fatkeqësisht për sa kohë ata mbështesin idenë e Berishizmit, të bësh aleancë sot me Berishën, do të thotë të mos i hapësh luftë politikës shqiptarë, por t’i shpallësh luftë shteteve të Bashkuara të Amerikës dhe Britanisë.
Çdo përpjekje për të zgjidhur opozitarizmin nëpërmjet Berishës do të thotë t’i zgjasësh jetën Edi Ramës dhe të marrësh në qafë qindra mijëra votues që besojnë te këto forca politike”, deklaroi ai.
