Në palestrën e sportit në Zubin Potok sot ishte paraparë të zhvillohet ndeshja ilegale e Superligës B të Serbisë në hendbolll, grupi Lindje-Perëndim, mes Mokra Gorës dhe Kurshumlijës nga Serbia. Kurshumlija nuk ka mundur të futet në Kosovë, e para nuk kishte leje nga autoritetet e shtetit të Kosovës, e dyta nuk mund t’i zhvillojë ndeshjet në një shtet tjetër siç është Kosova në kuadër të Serbisë.
Trajneri i Kurshumlijës, Avram Iliq, tregon se si në kufirin e Merdares u kthyen pas. Ai tregon se, policia e Kosovës nuk i ka lejuar të shkojnë në Zubin Potok. Iliq shpjegoi se kontrolluesit në vendkalim kërkuan dokumente, pastaj ata shpërndanë letra për sportistët në të cilat shkruante se nuk kishte ngjarje sportive.
“Kur shkojmë në ndeshje, zakonisht shkojmë me transportin tonë, këtë herë kemi udhëtuar me një transportues privat nga Graçanica, mbase kjo është arsyeja pse na ndaluan ata. Megjithëse, kur na kërkuan të hapnim çantat tona, ata panë pajisjet dhe fanellat tona sportive, atëherë ata na thanë se duhet të ktheheshim, se nuk mund të hynim në Kosovë“, tha Iliq për "Kosova Online".
Hendbollistëve gjithashtu iu dha një dokument në të cilin ishte shkruar se "sportistët nuk mund të hyjnë në Kosovë sepse konsiderohet si një kërcënim për sigurinë e brendshme politike, shëndetin publik dhe marrëdhëniet ndërkombëtare".
“Ata na thanë të prisnim, ata na dhanë disa letra që thoshin se nuk kishte ngjarje sportive, por ata nuk ishin jo miqësorë ndaj nesh. Në një moment, ata gjithashtu përmendën situatën me koronavirusin, natyrisht, ne i kishim maskat në rregull, por ata na kthyen përsëri", - thotë Iliq.
