Nëntë viktima për katër vite në rrugën Tetovë – Jazhincë

Tetova

Nëntë viktima për katër vite në rrugën Tetovë – Jazhincë

Më: 12 prill 2021 Në ora: 15:53
Foto Ilustrim

Dikur ishte cilësuar si “rruga e vdekjes”, sepse brenda vitit regjistroheshin mbi 10 viktima, kryesisht këmbësorë. Por, sot edhe pse numri i viktimave është dukshëm më i vogël, megjithatë shqetësimi për përmirësimin e gjendjes së kësaj rruge është i lartë si nga vozitësit por edhe nga ekspertët e komunikacionit. Kësisoj rruga Tetovë – Jazhincë vazhdon të jetë e stërngarkuar dhe me një komunikacion të dendur brenda ditës. Pasiguria paraqitet në zonën nga Drenoveci e deri në dalje të fshatit Xhepçisht, ku shtëpitë dhe bizneset lokale janë të vendosura përgjatë kësaj rruge duke e bërë të rrezikshme këtë aks rrugor, që ka karakterin e rrugës rajonale.

Por, këtë karakter kjo rrugë e ka humbur që moti për shkak të dendësisë së komunikacionit edhe pse lidh dy shtete, Maqedoninë e Veriut dhe Kosovën, përmes vendkalimit kufitar Jazhincë. Brenda katër viteve të fundit, numri i viktimave është zvogëluar në maksimum, kurse më shumë viktima kishte në vitin 2017, gjithsej 4 persona kishin humbur jetën e tyre në aksidente trafiku. Më pas, brenda çdo viti ka nga dy viktima në këtë aks rrugor, ku qarkullojnë mijëra vetura brenda 24 orëve.

Kështu qëndron në përgjigjen e Sektorit për Punë të Brendshme në Tetovë të dhënë për gazetën Koha. “Sipas statistikave të evidentuara në Sektorin për Punë të Brendshme Tetovë, në rajonin e Tetovës, më saktësisht në zonën e dytë të sigurisë që përfshin edhe rrugën rajonale Tetovë – Jazincë, gjatë vitit 2017 kanë ndodhur 116 aksidente trafiku, në të cilat 4 persona kanë humbur jetën, në vitin 2018 kanë ndodhur 94 aksidente trafiku, në të cilat kanë humbur jetën 2 persona, gjatë vitit 2019 kanë ndodhur 98 aksidente trafiku, në të cilat një person ka humbur jetën, dhe në vitin 2020 ka pasur 82 aksidente trafiku dhe janë regjistruar 2 viktima nga këto aksidente trafiku. Ku numri i viktimave të evidentuara, gjatë këtyre 4 viteve është 9 viktima që kanë pësuar dhe kanë humbur jetën në aksidente”, deklaroi për gazetën Koha, Fatmir Rexhepi, zëdhënës i Sektorit për Punë të Brendshme në Tetovë.

Një nga faktorët që ka ndikuar në uljen e aksidenteve të trafikut në këtë rrugë është edhe vendosja e pengesave rrugore që janë rreth dhjetë sosh nga lagjja e Drenovecit e deri në fshatin Xhepçisht. Vendosja e këtyre pengesave rrugore ishte bërë me iniciativë të banorëve të këtyre tre vendbanimeve (Drenovec, Poroj dhe Xhepçisht), për shkak se kohëve të fundit ishin rritur aksidentet e trafikut ku për pasojë jetën e kishin edhe këmbësorë të këtyre vendbanimeve. Së fundi është paralajmëruar një iniciativë për ndërtimin e një rruge alternative nga Tetova për në fshatin Neproshten të Komunës së Tearcës. Kjo rrugë edhe pse ishte paralajmëruar që të fillonte të ndërtohej vite më parë, megjithatë sipas deklarimeve të zyrtarëve shtetërorë për gazetën Koha, pritet që punët të fillojnë vitin e ardhshëm.

commentFirst article
Sot mund të lexoni Shfletoni kopertinat