Cilat ushqime i bëjnë fëmijët më të zgjuar

Ushqime

Cilat ushqime i bëjnë fëmijët më të zgjuar

Më: 8 qershor 2021 Në ora: 21:24
Foto ilustrim

Kur flasim ose mendojmë për ushqim të shëndetshëm mendja jonë pothuajse gjithmonë kalon te ushqimet që do të na japin energji dhe tek ushqimet që do të na mbrojnë nga kanceri, diabeti ose ndonjë sëmundje tjetër në të ardhmen.

Por përveç sa më sipër, ushqimi ka aspekte të tjera që lidhen me shëndetin e njeriut. Shëndeti dhe funksioni ditor i trurit është një prej tyre dhe veçanërisht për fëmijët më të vegjël.

Truri merr shumicën e lëndëve ushqyese që i duhen për të kryer funksionet e tij të përditshme, të tilla si të mësuarit, të menduarit dhe të mësuarit përmendsh. Çdo ushqim dhe pije që fëmija konsumon gjatë ditës mund të ndikojë në zhvillimin dhe performancën e trurit të tij. Kjo është diçka jashtëzakonisht e rëndësishme për trurin e fëmijës që evoluon me shpejtësi dhe ndikon në performancën e fëmijës në shkollë.

Një studim i fundit i kryer në Korenë e Jugut ekzaminoi sesi zgjedhjet e ndryshme dietike ndikojnë në funksionin njohës të fëmijëve. Në këtë studim, ata mblodhën informacione të hollësishme në lidhje me dietën e një grupi fëmijëve në thelb gjithçka që kishin ngrënë dhe i vunë ato në një seri testesh njohëse. Duke vlerësuar performancën e fëmijëve në këto teste, ata i krahasuan ato me zgjedhjet e fëmijëve për ushqim, llogaritën lëndët ushqyese që ata konsumuan dhe u përpoqën të identifikonin tendencat mbizotëruese në të dhëna.

Kur përfundoi ky proces, kishte vërtet korrelacion midis zgjedhjeve dietike të fëmijëve dhe funksionit të tyre njohës. Për shembull, konsumi i petëve dhe orizit të bardhë u zbulua se shoqërohej me performancë të reduktuar në teste të ndryshme, përfshirë ato të kujtesës dhe të menduarit. Konsumi i pijeve freskuese dhe ushqimit të shpejtë u shoqërua gjithashtu me performancë të dobët të testit. Në të kundërt, arrat, kërpudhat, perimet, mishi dhe shpendët patën një efekt pozitiv në kujtesën dhe mendimin e fëmijëve.

Studiuesit analizuan lëndët ushqyese të ushqimeve të mësipërme dhe gjetën një korrelacion pozitiv midis vitaminave B1, B6 dhe C si dhe kaliumit me performancën e kujtesës afatshkurtër. Për më tepër, ata zbuluan se një dietë me pak proteina, vitaminë D, vitamina B dhe zink ishte e lidhur me më shumë gabime në provë tek fëmijët, ndoshta për shkak të pakujdesisë.

Në çdo rast, studiuesit theksojnë se çështja e të ushqyerit është komplekse dhe nuk mund të kufizohet në një listë të shtojcave dietike me përfitime specifike për shëndetin dhe funksionin e trurit. Mbi të gjitha, studimet mbi suplementet e vitaminave kanë treguar rezultate të përziera, duke e bërë të vështirë krijimin e një liste përfitimesh që sjellin suplemente specifike.

Shfaq komentet
comments powered by Disqus
Sot mund të lexoni Shfletoni kopertinat