Ministri i Mjedisit dhe Planifikimit Hapësinor, Fatmir Matoshi ka pritur në takim ministren e Integrimeve Evropiane, Dhurata Hoxha me të cilën kanë diskutuar për fondet e IPA-së në fushën e mjedisit dhe zbatimin e direktivave të BE-së.
E përsërit ministrja Hoxha:Kosova nuk ka humbur asnjë cent nga fondet e BE-së
Ministri i Mjedisit dhe Planifikimit Hapësinor, Fatmir Matoshi ka pritur në takim ministren e Integrimeve Evropiane, Dhurata Hoxha me të cilën kanë diskutuar për fondet e IPA-së në fushën e mjedisit dhe zbatimin e direktivave të BE-së.
Ministri i Mjedisit, Fatmir Matoshi tha se me ministren Hoxha kanë diskutuar për projekte që e përmirësojnë mjedisin dhe ambientin në vend.
Ai u zotua se të gjitha projekte do mundohen t’i përfundojnë me kohë, pasi që Kosova sipas tij nuk e ka luksin që të humb fonde për interesa të caktuara.
Matoshi: Ndërrimi i filtrave të Kosovës B, ndërtimi i deponisë në Fushë Kosovë ndër temat që diskutuam
“Kemi folur për shumë tema, shumë projekte ndër to ndërrimit i filtrave të Kosovës B, ndërtimi i deponisë në Fushë Kosovë pë r materiet e klasifikuara si të rrezikshme, për fondet ndërkufitare me Shqipërinë, për projektet e deponisë së Mirashit, të deponisë në Pejë dhe shumë projekte tjera të cilat janë të planifikuara me fondet IPA”, ka theksuar ai.
Të suksesshëm këtë takim e ka konsideruar edhe ministrja e Integrimeve Evropiane, Dhurata Hoxha e cila kërkoi që këto projekte të fillojnë sa më parë dhe mos të ketë vonesa.
Hoxha: Është me rëndësi që projektet të fillojnë sa më parë
“Jemi duke diskutuar për projekte të rëndësishme apo ndërtimin e deponisë për materiale të rrezikshme në Fushë Kosovë, dhe për ne është shumë e rëndësishme që sa më parë të filloi projekti meqë lokacioni është identifikuar dhe është me rëndësi që qytetarët e kësaj pjese mos të jenë ende thjesht në rrezikun e mbeturinave...Për fat të mirë kemi projektin që fondi i Bashkimit Evropian do të jap paratë buxhetin për ndërrimin e filtrave në termocentralin Kosova B, ky është një projekt shumë me rendësi që paratë derdhen në buxhetin e Republikës së Kosovës dhe për ne është shumë me rëndësi që mos të kemi vonesa”, ka thënë Hoxha.
Sipas saj Kosova nuk ka humbur asnjë cent nga fondet e dhuruara nga BE dhe se Kosova është përfituesi më i madh në rajon nga këto fonde.
Hoxha: Nuk kemi humbur asnjë cent
“Nuk kemi humbur asnjë cent, jemi në rrugë të mirë të përfitimit të fondeve të Bashkimit Evropian. Republika e Kosovës është përfituesi më i madh në rajon i fondeve të Bashkimit Evropian, gjegjësisht është përfituesi më i madh apo i dyti në botë për kokë banori pas Palestinës...Ministria e Integrimit Evropian është në proces të koordinimit të plotë me të gjitha institucionet në mënyrë që mos të kemi vonesa në projekte”, ka theksuar ajo.