Pas dorëheqjes së Ramush Haradinajt nga posti i kryeministrit të Kosovës, partitë politike kanë filluar përgatitjet për zgjedhjet e parakohshme. E një gjë të tillë, si duket është duke e bërë edhe partia e Behgjet Pacollit, Aleanca Kosova e Re.
Për këtë ka folur anëtari i kësaj partie, Arbër Geci, i cili tha se edhe partia që i përket, është që vendi të shkojë në zgjedhje, ndërsa, shtoi se mendimi i shumicës brenda partisë, është që AKR të garojë e vetme.
Madje, ai tha se AKR ngado që do të pozicionohet, do të jetë pjesë e bllokut fitues.
“Jemi për të shkuar në zgjedhje. Mendimi i shumicës në AKR është që të garojmë si parti e vetme. Nuk kam asnjë dileme për kalimin e pragut. Por ju siguroj, që AKR, do të jetë pjesë e bllokut fitues të zgjedhjeve”, tha ai.
Sa i përket programit që AKR do ta këtë në këtë fushatë zgjedhore, Geci thotë që prioritet do të jetë rinia e vendit. Ai, nuk ka treguar nëse kanë ndonjë parti me të cilën do të refuzonin kategorikisht të hynin në koalicion.
“Prioriteti i fushatës sonë do të jetë rinia dhe mos largimi i saj nga vendi. Nuk mund ta them se kemi vija të kuqe, sepse kam frikë që mund të përfundojmë me cilëndo që e them, sepse kështu po ndodh. Por, mendoj që një pjesë e partive politike do të përjashtohen nga mundësia për të bërë koalicion parazgjedhor. Nuk mund të them se cilat janë këto parti”, deklaroi Arbër Geci në Frontal.