Banorët e Lagjes së Boshnjakëve, në zgjedhjet e 6 tetorit, do t’i drejtohen një objekti të ri për të votuar. Kjo do të ndodhë pasi Zyra Administrative, në objektin e së cilës kanë votuar deri më tani, është zhvendosur në objektin e komunës së Mitrovicës së Veriut.
Objekti i ri, i cili ndodhet pak metra larg ish objektit të Zyrës Administrative, është pronë e zyrtarit komunal nga PDK-ja, Bashkim Cimili. Një gjë e tillë është duke u kundërshtuar nga Lidhja Demokratike e Kosovës dhe Lëvizja Vetëvendosje.
Lidhur me këtë temë analisti politik, Rexhep Shahu, në një prononcim për “Bota sot”, tha që ky gjest që ka bërë Partia Demokratike e Kosovës është një lloj imponimi dhe një gjest i ulët, sipas Shahut, PDK, po shfrytëzon çdo lloj mundësie për tu imponuar.
“Një sfidë, më duket si një sfidë e PDK, që imponon votuesit të votojnë në një objekt pronë e një zyrtari të PDK. Për lajm për fushatë zgjedhjesh zë vend, por nuk do të thotë që votuesit e vendosur të imponohen të ndryshojnë qëndrim e të tradhtojnë LDK e VV për PDK. Ky veprim tregon një vogëlsi të PDK që të shfrytëzojë çdo mundësi për tu imponuar. Gjeste të vogla të vegjlish”, përfundu Shahu.