Kryeministri Avdullah Hoti, gjatë prezantimit të programit qeverisës ka thënë se si çështje me rëndësi në këtë mandat qeverisës, e kanë përmbylljen me sukses të dialogut Kosovë-Serbi.
Hoti theksoi se duhet të krijojnë kohezion mes të gjitha forcave politike pozitë dhe opozitë, për të përmbyllur suksesshëm këtë çështje.
“Në programin tonë qeverisë është edhe dialogu me Serbinë. Ku kemi disa orientime të qarta për të ju qasur këtyre çështjeve në veçanti tek dialogu me Serbinë, për të krijuar atë kohezionin e nevojshëm mes të gjitha forcave politike, pozitë dhe opozitë, për të përmbyllur me sukses këtë çështje dhe për të filluar përfundimisht konsolidimin e shtetit të Kosovës dhe në arenën ndërkombëtare”, ka thënë Hoti.
Ndërkaq, në kuadër të objektivave, Qeveria Hoti ka paraparë marrjen e plotë të përgjegjësive sa i përket dialogut Kosovë-Serbi.
“Objektivat tjera do të jenë forcimi i shtetit, avancimi i demokracisë, luftimi i krimit dhe korrupsionit, zhvillimi ekonomik, marrja e plotë e përgjegjësive si qeveri për të quar përpara dialogun me Serbinë në bashkëpunim me SHBA-të dhe BE-në duke mos lejuar ndryshimin e kufijve dhe shkëmbim të territoreve, avancim i procesit të integrimeve evropiane, zbatimi i plotë i agjendës së reformave evropiane dhe krijimi i një atmosfere bashkëpunimi pozitë-opozitë për çështjet vitale në interes të vendit”, tha ndër të tjera Hoti.
Ndryshe, Hoti tha se objektivat e menjëhershme të kësaj qeverie janë beteja ndaj pandemisë COVID-19 dhe rimëkëmbja ekonomike.
