Kryeredaktori i televizionit slloven “Planet TV”, Mirko Mayer, ka njoftuar se Gjykata e Apelit në Slloveni ka hedhur poshtë ankesën e ambasadorit të Kosovës në Kroaci, Martin Berishaj, në lidhje me rastin kundër gazetarit Vitomir Petroviq.
Berishaj kishte paditur Petroviqin në Gjykatën e Qarkut në Lubjanë në lidhje me raportimin që implikonte Berishajn në një skandal financiar.
Lidhur me këtë rast, ka folur ish-ambasadori i Kosovës në Slloveni, Anton Berisha i cili konsideron se duhet të shkarkohen kryeministri Albin Kurti dhe presidentja Vjosa Osmani.
Sipas tij, ata po e dëmtojnë Kosovën ndërkombëtarisht.
“Kosova duhet ta shkarkoj Kurtin e Osmanin si dy përfaqësuesit më të lartë që e kanë dëmtuar shtetin e Kosovës në arenën ndërkombëtare si askush më parë deri më tani”, shprehet ai.
Diplomacia e Kosovës aktualisht, për ish ambasadorin Berisha është e zhytur në skandale.
Ai thotë se tash e dy vite nuk ka asnjë rezultat me këtë qeveri.
“Besoj që janë thënë të gjitha për këtë rast. Diplomacia kosovare aktuale është inekzistente e zhytur në skandale, joprofesionalizëm, partiake e nepotike dhe pa asnjë rezultat në dy vitet e qeverisë Kurti”, tha ai.
Sipas “Planet TV”, kryeministri slloven, Robert Golob, është duke u hetuar ndërkombëtarisht për disa transaksione që i ka dërguar nga një degë serbe e furnizuesit energjetik slloven GEN-I, te kompania e ambasadorit kosovar MB Consulting. Duke u mbështetur në këtë raportim, kompania e Berishajt i ka marrë 600 mijë euro të cilat gradualisht i ka nxjerrë në para të gatshme e që dyshohet se ia ka kthyer kryeministrit të tashëm slloven Robert Golobit, që ky pastaj t’i investojë në një nga fondet italiane që u siguron përdoruesve anonimitet.
Por, këto akuza ambasadori Berishaj i ka mohuar kategorikisht.