Militantët talibanë sulmuan disa postblloqe të sigurisë në perëndim të Afganistanit duke vrarë 21 zyrtarë policorë dhe pjesëtarë të milicisë pro-qeveritare, njoftuan të hënën autoritetet.
Sulmet ndodhën në dy pjesë të ndryshme të provincës Badghis, e cila kufizohet me Turkmenistanin.
Abdul Aziz Bek, udhëheqës i këshillit provincial, tha se 14 policë janë vrarë, ashtu si edhe shtatë pjesëtarë të milicisë.
Jamshid Shahabi, zëdhënës i guvernatorit të provincës, tha se së paku 15 militantë talibanë janë vrarë dhe dhjetë janë plagosur në luftime.
Talibanët e morën përgjegjësinë për sulmin.
Zëdhënësi i tyre, Qari Yousuf Ahmadi, tha përmes një deklarate se militantët kanë vrarë 34 pjesëtarë të forcave të sigurisë.