Rusia thotë se një prej anijeve të saj luftarake kapi dhe dëboi një destrojer amerikan, që kishte hyrë në ujërat e saj territoriale. Moska tha se anija USS John S McCain kishte hyrë dy kilometra brenda ujërave të saj territoriale në Detin e Japonisë.
Kremlini tha se e kërcënoi destrojerin amerikan se do e godiste nëse nuk do të largohej. Më pas anija luftarake amerikane u largua. Megjithatë, flota amerikane mohoi këtë gjë, duke thënë se anija e tyre nuk është dëbuar.
Incidente të tilla janë të rralla, megjithatë vitin e shkuar dy anije luftarake të SHBA dhe Rusisë për pak u përplasën në Detin e Kinës Jugore. Të dy vendet akuzojnë rregullisht njëra-tjetrën se bëjnë manovra të rrezikshme në det dhe ajër.
Tensionet mes SHBA dhe Rusisë janë të larta, ndërkohë që Moska nuk e ka uruar akoma presidentin e zgjedhur, Joe Biden.
Kujtojmë se në vitin 2017, destrojeri amerikan USS John S Mçain u përplas me një cisternë nafte në Singapor. Si pasojë vdiqën 10 marinarë.