Deklarata e ministrit të Jashtëm të Rusisë, Lavrov se hapja për faljen e myslimanëve të “Shën Sofisë” në Stamboll ishte një çështje brendshme e Turqisë, ka shkaktuar reagime të forta në mediat greke.
“Zougla.gr“, shkruan se kjo deklaratë ishte e pritshme duke e lidhur mbështetjen e Rusisë ndaj vendimit të Erdoganit me raportet ekonomike dhe ushtarake mes dy shteteve.
Gazeta greke përmend faktin se Turqia ka blerë sistemet raketore “S-400” nga Rusia, ndërsa ka shumë marrëveshje tregtare mes tyre.
“Reagimi i Lavrov në mbështetje të Erdoganit ka ardhur në një kohë kur kreu i Kishës Ortodokse të Rusisë reagoi kundër vendimit për Shën Sofinë”, shkruan media greke.
“Ekathimerini” i referohet gjithashtu deklaratës në mënyrë telegrafike duke u fokusuar gjithashtu tek raportet e ngushta mes Putinit dhe Erdoganit.
Pak ditë më parë, Presidenti i Turqisë Rexhep Tayyib Erdogan firmosi dekretin sipas të cilit godina e Katedrales së “Shën Sofisë” do të hapej për faljen e besimtarëve myslimanë, një veprim ky i ndaluar që prej vitit 1935 kur ajo u kthye në muze.
