Kryeministri ukrainas të dielën tha se është e sigurt që Ukraina do të rimarrë të gjitha tokat e saj nga Rusia.
“Ne nuk e dimë se kur do të përfundojë lufta, por është e sigurt që do të rimarrim të gjithë tokën tonë”, tha Denys Shmyhal në një intervistë për agjencinë e lajmeve të Koresë së Jugut Yonhap.
"Ne po bëjmë gjithçka që mundemi për t'i dhënë fund luftës. Për këtë, komuniteti ndërkombëtar duhet të mbajë rreptësisht sanksionet ndaj Rusisë dhe t'i forcojë ato," shtoi ai.
Shmyhal tha se sulmet ajrore ruse dëmtuan 50% të rrjeteve energjetike të Ukrainës, duke shtuar: "Nuk ka asnjë termocentral të vetëm që të mos jetë goditur nga raketat ose dronët rusë. Qëllimi i Rusisë është të eliminojë të gjitha rrjetet energjetike të Ukrainës dhe të detyrojë popullin tonë të ikin duke u bërë presion psikologjik”.
Ai i bëri thirrje komunitetit ndërkombëtar që të ndihmojë Ukrainën gjatë dimrit dhe të rivendosë energjinë elektrike, si dhe rrjetet e rrugëve dhe ujit.
Shmyhal tha gjithashtu se lufta e Rusisë ndaj Ukrainës e ka kthyer vendin e tij në "fushën më të madhe të minave në botë", duke krijuar një fushë të minuar prej 250.000 kilometrash katrorë në Ukrainë.
"Kjo jo vetëm që po e bën të vështirë për njerëzit udhëtimin, por gjithashtu po shkakton ndërprerje të mëdha në bujqësi, e cila është një nga industritë tona kryesore," shtoi ai./AA
