Presidenti i Republikës Serbe të Bosnjës, Milorad Dodik priti sot kryeministrin hungarez Viktor Orban në pronën e tij pranë Laktashit.
“Sot prita kryeministrin e Hungarisë, Viktor Orban, me familjarë, kolegë dhe miq. Në tubim, e falënderova për respektin që tregoi për Republikën Srpska me vizitën e tij”, njoftoi Dodik në Twitter.
Dodik publikoi gjithashtu foto të tij dhe Orbanit duke vizituar kopshtin e presidentit të RS.
Gjatë vizitës së tij zyrtare në BeH, Orban fillimisht qëndroi në Sarajevë, ndërsa dje me bashkëpunëtorët e tij mbërriti në Banja Llukë, ku u nënshkrua Deklarata e Përbashkët për Bashkëpunimin ndërmjet RS dhe Qeverisë së Hungarisë.
Orban vazhdon të jetë në thumbin e kritikave nga BE-ja dhe SHBA-ja për qasjen e tij ndaj Rusisë dhe Serbisë.
Orban nuk ka pranuar t’i vendos disa prej sanksioneve Rusisë, ndërsa vazhdon të jetë i afërt edhe me presidentin serb, Aleksandar Vuçiq, e së fundi edhe me Dodikun, i cili është futur në listën e zezë të SHBA-së për shkak të korrupsionit dhe minimit të vazhdueshëm të funksionimit të Bosnjës dhe Hercegovinës.
Dodik është mik personal i Vladimir Putinit, të cilin e ka vizituar disa herë.
