Ministri i Jashtëm rus Sergej Lavrov e krahasoi SHBA- në me diktatorin francez Napoleon Bonaparte dhe liderin nazist gjerman Adolf Hitler , duke thënë se ajo ka bashkuar Perëndimin në përpjekjen për t’i shkaktuar një “disfatë strategjike” Rusisë .
“Ashtu si Napoleoni në 1812, Hitleri në 1941, SHBA-të sot kanë bashkuar pothuajse të gjitha vendet perëndimore për të provuar edhe një herë të shkatërrojnë Rusinë, t’i shkaktojnë asaj një “disfatë strategjike” dhe ta eliminojnë atë si një lojtar të pavarur në arenën ndërkombëtare”, tha Lavrov teksa iu drejtua një tubimi të bashkatdhetarëve rusë që jetojnë jashtë vendit në Moskë.
Ministri tha se niveli i veprimeve anti-ruse në vendet perëndimore shkon përtej çdo mase dhe prek diasporën ruse.
Lavrov kritikoi Perëndimin për braktisjen e vlerave tradicionale dhe parimet morale, propagandimin e “tolerancës së arritur në pikën e absurditetit”.
“Simbolet fetare po ndalohen, në BE mbyllin sytë ndaj sakrilegjimit të faltoreve myslimane, veprime për të shkatërruar, pa ekzagjerim, fenë ortodokse.
“Në Ukrainën fqinje, nazistët dhe antisemitët glorifikohen në nivel zyrtar, ata po udhëheqin çështjen për të ndaluar Kishën Ortodokse kanonike, për të thelluar përçarjen e kishës”, theksoi ai.
Diplomati paralajmëroi se një kurs i tillë “shkakton dëme të pariparueshme në shëndetin moral të njerëzve, i privon ata nga rrënjët e tyre civilizuese, çon në tjetërsimin e ndërsjellë, depersonalizimin, vetëshkatërrimin e shoqërisë” dhe kontribuon në rritjen e radikalizmit, nacionalizmit agresiv, neo-nazizmi, ksenofobia dhe intoleranca.
Përpjekjet e elitave perëndimore për të imponuar vlerat e tyre, të cilat janë “të huaja” për kombet e tjera, çojnë në shkatërrim, theksoi ministri, duke përmendur si shembull Lindjen e Mesme dhe Afrikën Veriore.
Lavrov tha se nuk ka dyshime se problemet aktuale do të tejkalohen, duke përfshirë edhe ndihmën e bashkatdhetarëve, të cilët mbeten bartës të traditave, duke ua përcjellë ato fëmijëve dhe nipërve, duke kontribuar në formimin e një imazhi objektiv dhe të paanshëm të vendit.
“Rusia si shtet qytetërues do të vazhdojë të mbrojë parimet morale të jetës ndërkombëtare, të promovojë parimet e ndershmërisë, së vërtetës, mirësisë dhe drejtësisë në komunikimin ndërshtetëror”, tha ai.
