Kancelari gjerman Olaf Scholz premtoi të shtunën një hetim të plotë pasi ajo që dukej të ishte një regjistrim i bisedimeve konfidenciale të ushtrisë mbi luftën në Ukrainë u postua në mediat sociale ruse.
Ndryshe, drejtuesja e kanalit RT të mbështetur nga shteti rus, Margarita Simonyan, të premten postoi regjistrimin audio 38-minutësh të atyre që ajo pretendonte se ishin oficerë të ushtrisë gjermane më 19 shkurt duke diskutuar sulmet e mundshme në Krime.
“Ajo që raportohet është një çështje shumë serioze dhe kjo është arsyeja pse ajo tani po hetohet me shumë kujdes, shumë intensivisht dhe shumë shpejt”, ka thënë Scholz gjatë një vizite në Romë.
Në regjistrim mund të dëgjohen diskutime për përdorimin e mundshëm nga forcat ukrainase të raketave Taurus të prodhimit gjerman dhe ndikimin e tyre të mundshëm.
Temat përfshijnë objektiva të tilla si një urë kyçe mbi ngushticën e Kerçit që lidh kontinentin rus me Krimenë, e cila u aneksua nga Rusia në 2014.
Diskutimet mbulojnë gjithashtu përdorimin e raketave që i janë ofruar Kievit nga Franca dhe Britania.
Një zëdhënëse e ministrisë gjermane të mbrojtjes konfirmoi për AFP se ministria beson se një bisedë në divizionin e forcave ajrore ishte “përgjuar”.
“Aktualisht nuk jemi në gjendje të themi me siguri nëse janë bërë ndryshime në versionin e regjistruar apo të transkriptuar që po qarkullon në mediat sociale”, tha zëdhënësja.
Ndërsa ekspertët e konsultuar nga revista Der Spiegel thanë se besonin se regjistrimi ishte autentik.
