Kremlini tha se Rusia do të mirëpresë çdo ambasador amerikan, i cili tregon "angazhim të fuqishëm për idenë e themelimit të dialogut" midis Uashingtonit dhe Moskës.
Dmitry Peskov, zëdhënës i presidentit rus, Vladimir Putin, i bëri këto komente në përgjigje të raporteve se presidenti i Shteteve të Bashkuara, Donald Trump, ka kërkuar nga Jon Huntsman, ish-guvernator i shtetit Utah, të shërbejë si ambasador i SHBA-së në Moskë.
Huntsman ka qenë ambasador në Kinë në periudhën 2009-2011 dhe ambasador në Singapor më 1992-1993.
Trump ka bërë thirrje për përmirësimin e marrëdhënieve SHBA-Rusi, të cilat janë përkeqësuar pas agresionit të Moskës në Ukrainë, veprimeve të saj në Siri dhe akuzave se hakerët rusë kanë ndërhyrë në zgjedhjet presidenciale në SHBA më 2016.