Një 24 vjeçar shqiptar ka ndërruar jetë në Itali. Aldi Cala është gjetur i vdekur në dhomën e tij të gjumit e për momentin mendohet se vdekja i ka ardhur nga shkaqe natyrale, shkruan oranews.
Aldi Cala, i lindur në Kavajë, jetonte prej shumë vitesh së bashku me familjen, në qytezën Pontetetto në provincën e Lucca-s.
Ishte mjaft i njohur në territorin e kësaj zone, pasi ka qënë një nga talentet sportive të futbollit në sektorin e të rinjve në klubin lokal Folgor Marlia.
Një natë para tragjedisë, (e shtunë datë 5 tetor 2019) Aldi Cala. kishte kaluar mbrëmjen me miqtë e tij.
Në banesë ishte kthyer natën vonë e prindërit duke menduar se po flinte e kanë lënë të pushojë deri pas dreke.
Por kur kanë hyrë në dhomën e tij për ta zgjuar kanë zbuluar fatin e keq.
Me gjithë ndërhyrjen e urgjencës spitalore, 24 vjeçari shqiptar kishte ndërruar jetë.
Prokurori që po heton mbi zbardhjen e motivit të kësaj vdekje, ka vendosur të mos kryejë autopsinë e trupit, i cili nuk ka asnjë shenjë dhune e ngjarja nuk sjell asnjë dyshim për të menduar për shkaqe të tjera.
Do të mjaftojë një analizë e jashtme e trupit, e cila do të zyrtarizoj motivin e vdekjes.
Më 19 shkurt, Aldi Cala, do të mbushte 25 vjeç. Aldi përshkruhet nga miqtë e tij shqiptarë e italianë si një djalë plot energji e dashuri për jetën e miqësinë.