Ndeshjet e radhës do të jenë vendimtare për të ardhmen e Gennaro Gattusos. Humbja ndaj Veronës, pas dështimit në Superkupën e Italisë përballë Juventusit, ka bërë që Aurelio de Laurentiisit t’i soset durimi.
Presidenti i napolitanëve kërkon përgjigje të menjëhershme në fushën e blertë, kundër Spezias, në Kupën e Italisë, dhe më pas përballë Parmës dhe Genoas në kampionat. Duhen tri fitore bindëse, të nevojshme për të shmangur shkarkimin e “Ringhios”.
Marrëdhëniet midis presidentit dhe trajnerit nuk janë të tilla sa të sjellin konfrontim me tyre, por sigurisht që ka pak ftohtësi. Palët nuk u sqaruan pas humbjes në Veronë, një shenjë se tensioni është krijuar përgjatë një sezon që nuk po shkon siç shpresohej. Sidomos për humbjet e shumta që ndikojnë direkt në klasifikim.
Një situatë që e ka bindur De Laurentiis që të marrë në konsideratë ndryshimin në stol.
Mendimet e tij menjëherë shkuan te Rafa Benitez, me spanjolli që ka vendosur të largohet nga Kina. Mediet në Itali shkruajnë që ka pa pasur kontakte mes palëve, por Benitez ka kërkuar pak kohë për të vlerësuar situatën, para se të marrë një vendim për të “shkarkuar” Gattuson.
