Xhakomo Vrioni sot ka arritur një objektiv të rëndësishëm pasi duke luajtur për herë të parë mes futbollistëve profesionistë, ka shënuar 10 gola në një sezon. Sulmuesi shqiptar, i huazuar nga Juventusi te Tiroli, ka shënuar sot golin e 10 të sezonit me skuadrën austriake, duke treguar se është përsëri në një formë të mirë.
Për fat të keq, goli i sotëm nuk i solli pikë skuadrës së tij, pasi ajo u mund me shifrat 3-2 në fushën e Ried.
Vendasit shënuan 3 gola dhe ishin në një avantazh të sigurt deri në fund të sfidës, kur Forst në të 90-ën dhe Vrioni në minutën e 91-të, çuan rezultatin në 3-2. Vrioni kishte në këmbët e tij edhe gjuajtjen që do të bënte heroin e Tirolit në minutën e 94-t, por nuk ia doli të kalonte portierin kundërshtar.
Gjithsesi, tashmë Vrioni është në kuotën e 10 golave në kampionat dhe gjendet në vendin e tretë në renditjen e golashënuesve më të mirë të këtij edicioni, me talentin e Salcburgut, Adejemi, i cili mban vendin e parë me vetëm 4 gola më shumë.
Ndërkohë, skuadra e Tirol gjendet në vendin e 10 në renditje dhe në pjesën e mbetur të sezonit, do të luajë në grupin e ekipeve që duan të evitojnë rënien nga kategoria.
