Herdi Prenga ndryshon skuadër, por mbetet në futbollin hungarez. Burime për SuperSport konfirmojnë se mbrojtësi i Kombëtares Shqiptare ka lënë Kisvardën, për t’u transferuar te klubi i Budapest Honved.
Marrëveshja mes palëve është arritur dhe pritet vetëm zyrtarizimi nga ana e klubit, teksa vetë mbrojtësi 27-vjeçar do të firmosë një kontratë 3-vjeçare me klubin e kryeqytetit të Hungarisë.
Te Budapest Honved, Prenga do të gjejë edhe një tjetër mbrojtës të kombëtares shqiptare, ish-in e Tiranës, Albi Doka, i cili luan aty prej janarit të këtij viti.
I rritur te akademia e Dinamos së Zagrebit, Prenga numëron disa eksperienca në futbollin kroat, teksa në 2019-ën u transferua në Letoni, te Riga dhe në 2021-shin, te Kisvarda në Hungari. Mbrojtësi është grumbulluar shpesh edhe nga kombëtarja shqiptare, por ka luajtur vetëm dy ndeshje me fanellën kuqezi.
