Monza ishte padyshim skuadra më e përfolur gjatë merkatos së verës, pasi thuajse rindërtoi nga fillimi skuadrën për të garuar denjësisht në Serinë A, por pavarësisht emrave, starti i sezonit ishte tërësisht për t’u harruar.
Pas 5 humbjesh radhazi, skuadra nuk shkoi dot përtej barazimit 1-1 në transfertën ndaj Lecces dhe Galliani humbi durimin, duke vendosur shkarkimin e Giovanni Stroppa-s, trajneri që ngjiti skuadrën nga Brianza për herë të parë në histori.
Ndonëse u përfolën shumë emra për pasuesin e Stroppës, Galliani ka vendosur t’ia besojë pankinën fillimisht ish-trajnerit të të rinjve të Monzës, Raffaele Palladino, i cili është që prej 2019-ës pjesë e stafit teknik të ekipit.
Palladino ka drejtuar stërvitjen pasditen e sotme dhe debutimin pritet ta bëjë në fundjavë përballë Juventusit. Mbetet të shihet nëse bëhet fjalë për një zgjidhje të përkohshme, apo Palladino do të luajë shanset e tij në stolin e Monzës.
Megjithatë në Itali duket se janë të bindur që Galliani e Berlusconi po studiojnë alternativa të tjera, për të bërë një tjetër ndryshim pas ndeshjes me Juven, kur edhe kampionati të ndërpritet për dy javë.
