“Katar 2022” mes risive që ka prodhuar në dy ditët e para ka qenë dhe fakti se janë dhënë shumë minuta shtesë. 57 minuta shtesë në total janë dhënë në 4 takimet e para të Kupës së Botës
Këto periudha të gjata shtesë janë rezultat i goditjes së FIFA-s për humbjen e kohës. Koha totale që ndahet mund të llogaritet nga gjyqtari i katërt, i cili bën dallimin midis vonesave të natyrshme në lojë. Në një intervistë për ESPN, ish-gjyqtari i Kupës së Botës dhe kryetari i komitetit të arbitrave të FIFA-s, Pierluigi Collina shpjegoi arsyetimin.
“Ne u thamë të gjithëve, mos u habisni nëse e shohin zyrtarin e katërt duke ngritur tabelën elektronike me një numër të madh mbi të, gjashtë, shtatë apo tetë minuta. Nëse doni më shumë kohë aktive, ne duhet të jemi gati për të parë këtë lloj kohe shtesë të dhënë.
Mendoni për një ndeshje me tre gola të shënuar. Një festë zakonisht zgjat një, një minutë e gjysmë, kështu që me tre gola të shënuar, humbisni pesë ose gjashtë minuta. Ajo që duam të bëjmë është të llogarisim saktë kohën e shtuar në fund të çdo pjese. Mund të jetë zyrtari i katërt që e bën këtë, ne ishim të suksesshëm në Rusi dhe presim të njëjtën gjë në Katar.
Nuk po flas për ndërhyrjen e VAR-it, kjo është diçka e ndryshme dhe e llogaritur në mënyrë shumë precize nga video-asistent gjyqtari. Edhe në kohën kur isha gjyqtar, informacioni (për kohën e shtuar) erdhi nga gjyqtari i katërt”, deklaroi Collina.
