Nuk është aspak profane të sillet në kujtesë një skenë historike e kinemasë botërore siç është ajo e treshes finale në filmin “I mirë, i keqi dhe i shëmtuari”, kryevepër e vitit 1966 nga Maestro Sergio Leone, për të analizuar momentin e Paris Saint Germain.
Në atë alternim të mundimshëm të fragmenteve të pamjeve shumë të afërta të shoqëruara me muzikën e të pavdekshmit Ennio Morricone, tre sfidues vëzhguan njëri-tjetrin ndërsa dora e tyre shkoi drejt revolverit, me synimin për të mbetur gjallë për të mbledhur thesarin e lakmuar.
Qëllimi i treshes në fjalë ishte të përcaktohej se kush nga të tre do të dilte i fituar. Sot, edhe pse në Camp des Loges sfida nuk do të përsëritet në të njëjtën mënyrë, shumë pyesin se kush mes Kylian Mbappe, Neymar Junior dhe Lionel Messi do të mbetet i fundit.
Në një sezon në të cilin praktikisht gjithçka shkoi keq për ekipin e trajnerit Christophe Galtier, skenari për të ardhmen e afërt rezulton të jetë potencialisht më katastrofik, duke qenë se asnjë nga tre fenomenet e përmendura më sipër mund të mos qëndrojë në Paris.
Sepse nëse kampioni argjentinas i botës duket se tashmë i ka mbushur valixhet me drejtimin nga Barcelona, edhe francezi me brazilianin mund të largohen nga Kulla Eifel.
Edhe pse largimi i Messit është krejtësisht i shkëputur nga dinamika negative që ka ngërthyer në Camp des Loges, peripecitë e fundit në të cilat është përfshirë klubi parisien padyshim që kanë ndikuar negativisht në perceptimet emocionale të dy kampionëve të tjerë.
Me argjentinasin gati për të ndryshuar rrugën që mori dy vjet më parë për t’u rikthyer në Camp Nou, nga Santiago Bernabeu duket se po kërkojnë të bëjnë goditjen që mund të ndezë entuziazmin e madrilenëve dhe gjithashtu të ftohë ambiciet e rivalëve.
Reagimi në fjalë është gjithmonë i njëjti: blerja e Kylian Mbappe, objekt i dëshirës së Florentino Perez, i cili nuk do të dukej shumë i mërzitur nga zgjedhja e bërë 11 muaj më parë nga francezi për të qëndruar në Paris duke refuzuar transferimin te Real Madrid.
Gjithmonë në kërkim të më të mirëve nga më të mirët, gjigantët e futbollit spanjoll dhe europian në fakt duket se janë vënë përsëri në lëvizje për yllin francez.
Shpesh kritik ndaj disa shokëve të skuadrës, mbi të gjitha ndaj Neymar, për mungesën e tyre të profesionalizmit, Mbappe mund të jetë seriozisht i interesuar të largohet nga ekipi. Megjithatë, para tij mund ta bëjë braziliani, për të cilin tashmë interesohet Manchester United.
Në atë rast, treshja e bërë e njohur nga Sergio Leone mund të transformohej në atë të Parisit, por fundi i notave të muzikës së pavdekshme të Morricone do të ishte gjithashtu fundi i ambicieve madhështore të Nasser Al-Khelaifi, president i një klubi ende të paaftë për të arritur në majë në Europë.
