Ndeshja kualifikuese e raundit të parë në Conference League mes Glentoran (Irlandë e Veriut) dhe Gzirës (Maltë) e përfundoi kohën e rregullt dhe atë shtesë në barazimin 1-1.
Për të vendosur skuadrën e kualifikuar duhej lotaria e penalltive e cila në fakt rezultoi një maratonë e pafund.
U deshën plot 28 penallti të goditura (27 u realizuan) që në fund Gzira të festonte kualifikimin falë 14 penalltive të realizuar me kundërshtarin që u ndal në 13. Ishte pikërisht penalltia e 28-të që u gabua nga Boyd dhe i dha mundësinë skuadrës malteze të prekë raundin e dytë të Conference League.
Pas ndeshjes, nga statistikat rezultoi se kjo ishte seria më e gjatë e penalltive në futbollin europian.
Ndërkohë, një moment interesant gjatë goditjes së 11-metërshave ishte edhe ai kur portieri mendoi se e ndali goditjen e kundërshtarit, por topi kaloi vijën fatale me arbitrin që e konsideroi gol të rregullt.
