Paolo Maldini mund t’ia nisë sërish angazhimit në futboll nga Arabia Saudite, në veçanti nga Al-Ittihad. Sipas Fabrizio Romano, në fakt, ish-kapiteni i Milanit është në rreshtin e parë për t’u bërë drejtori i ri i përgjithshëm i klubit ku luan Benzema. Po flasim për kampionin në fuqi të Arabisë Saudite.
Al-Ittihad sapo u rikuperua pas një periudhe të vështirë, e cila çoi në shkarkimin e Nuno Espirito Santo, trajnerit portugez, që nuk ishte në gjendje të mbante hapin me Al-Hilal, dominuesit absolutë të kampionatit, me Koulibaly dhe Milinkovic-Savic në radhët e tyre.
Maldini po mendon seriozisht të transferohet në Arabinë Saudite dhe në veçanti në Jeddah, ku luan Al-Ittihad, për të nisur një kapitull të ri në karrierën e tij, pas largimit nga Milani në fillim të qershorit 2023.
Muajt e fundit është folur edhe për një transferim të mundshëm në Paris të Maldinit, në mënyrë që të bëhet menaxher i PSG-së, por pa konfirmim të vërtetë. Pa punë në Milano, si Massara, menaxheri dhe ish-lojtari legjendar i kuqezinjve ka pritur sfidën e duhur, e cila tani mund ta çojë atë të marrë një rol në një kontinent tjetër dhe veçanërisht në Arabinë Saudite, si drejtor i Al-Ittihad.
Karim Benzema, ndër golashënuesit më të mirë të viteve 2000 dhe “Topi i Artë” 2022 është ylli i madh i Al-Ittihad, i cili mbërriti në verë pas largimit nga Real Madridi. Megjithatë, francezi nuk është ylli i vetëm i klubit.
Mjafton të thuhet se Fabinho dhe Kante, kampionët e ardhur nga Premier League, luajnë titullarë në mesfushë, ndërsa ish-lojtari i Lazios, Luiz Felipe luan në mbrojtje. Të rëndësishëm janë edhe dy brazilianët Coronado dhe Romarinho, ashtu si sulmuesi tjetër, marokeni Hamdallah.
Nuno Espirito Santo u shkarkua nga Al-Ittihad para ndeshjes së fituar kundër Abha 4-2, me Hassan Khalifa, i cili për momentin ka marrë përsipër skuadrën verdhezi në funksion të punësimit të një trajneri të ri.
Paolo Maldini luajti të gjithë karrierën e tij te Milani, duke fituar çdo trofe. Pasi i dha lamtumirën futbollit, djali (dhe babai) i artit dukej se mund të bëhej menaxher i Chelsea në kohën e Ancelottit, por në fund hipoteza u zbeh.
Me kalimin e kohës është folur shpesh për një detyrë të re të mundshme për Maldinin, deri në rikthimin e tij te Milani, në vitin 2018. Në vitin 2023 erdhi lamtumira e re me kuqezinjtë dhe më pas e shoqëruan thashethemet për PSG dhe Al-Ahly, deri tek ata që do të donin që ai të bashkohej me Al-Ittihad.
Nëse “martesa” mes Maldinit dhe Al-Ittihad do të bëhet, kjo do të jetë eksperienca e parë futbollistike jashtë Italisë dhe Milanit.
