Janë shitur të gjitha biletat për ndeshjen Milan-Roma që do të luhet të dielën në orën 20:45.
Stadiumi “San Siro” do të jetë sërish plot, ashtu siç ka ndodhur shumë herë gjatë këtij sezoni.
Por shifra më e rëndësishme, është se klubi kuqezi do të kalojë numrin e 1 milionë tifozëve të pranishëm në stadium në të gjitha kompeticionet këtë sezon. Një sinjal shumë i fortë për skuadrën e drejtuar nga Pioli.
Ndonëse sezoni ka qenë plot ulje-ngritje, Milani mund të mbështetet gjithmonë te përkrahja e publikut të vet. Kundër Romës së Mourinhos (nuk do të jetë në stol sepse është i skualifikuar), “San Siro” do të presë rreth 70 mijë spektatorë.
Një ndeshje e rëndësishme në kampionat, sidomos pas eliminimit të kuqezinjve nga Atalanta në Kupën e Italisë. Milani tashmë është i fokusuar tek kampionati dhe Europa League, dy objektivat që mund të arrihen këtë sezon.
