Aurelio De Laurentis, presidenti i Napolit, ka marrë pjesë në një eveniment të organizuar nga “Financial Times” në Londër ku ka folur për futbollin italian në përgjithësi, por duke u ndalur sidomos te Napoli i tij.
Gjatë diskutimeve, ai është fokusuar edhe te një pikë delikate që padyshim do të kthejë rivalitetin e ndezur me klubin e Juventusit.
Paraqitjet në këtë sezon në Ligën e Kampioneve të Napolit, mund t’i japin mundësinë kësaj skuadre të kapërcejë Juventusin në renditjen e UEFA-s dhe të marrë vendin e bardhezinjve në Botërorin e Klubeve që do të organizohet në verën e ardhshme nga FIFA.
Por ai mendon që gjithsesi napolitanët duhej të ishin pjesë e aktivitetit, pasi bardhezinjtë kanë mbi ta njollën e pezullimit për mashtrimin financiar që kanë bërë në sezonet e kaluara.
“Nëse do të mundim Barcelonën dhe pastaj të bëjmë një fitore ose një barazim, atëherë do të fitojmë ne të drejtën për të shkuar në Botërorin e Klubeve dhe jo Juventusi.
Por mendoj se Napoli duhet të shkojë gjithsesi atje, pasi nëse Juventusi është jashtë Kupave të Europës, atëherë nuk duhet të pranohet as në Botërorin e Klubeve”, tha presidenti i Napolit në fjalët e tij.
