Sot bëhen nëntëmbëdhjetë vite pa Xhevat Qenën dhe dy vite pa Leze Qenën, personazhet kryesore të kulturës shqiptare që lanë zbrazëtirë të madhe në shoqërinë tonë.
Figura e Lezës dhe Xhevatit dhe krijimtaria e tyre kujtohen me respekt dhe dashuri nga publiku i gjerë. Ishin çifti që theu shumë tabu shoqërore, që donin dhe përkrahnin njëri tjetrin aq sa e donin artin dhe krijimtarinë.
Ata të kanë bërë të besosh në secilin karakter, skenë, tekst dhe moment. Kanë bërë publikun të qeshë e të qajë përgjatë karrierës së tyre që është shtrirë në më shumë se pesëdhjetë vite.
Aktorë imagjinativë, te saktë në lojë, kreativ e spiritual, të besueshëm në rolet që krijonin.
Rrugëtimin e tyre në botën e artit e zhvilluan kryesisht në Teatër, por edhe në filma të metrazhit të gjatë, humoreska, video humor e seriale televizive, duke qenë gjithmonë pranë publikut shqiptar.
Xhevati dhe Lezja kanë qenë aktorë te pëlqyer dhe të dashur që jetuan jetën në sy të publikut e më të cilët u rritën shumë gjenerata.
Na dhuruan qindra role dhe kësisoj lanë gjurmë të pashlyeshme në zemrat, kujtesën tonë dhe historikun e artit në Kosovë./Teatri Kombëtar i Kosovës