Presidenti i Serbisë, Aleksandar Vuçiq, tha se Serbia është e gatshme për vazhdimin e dialogut me Kosovën në çdo situatë.
"Serbia është e gatshme për vazhdimin e dialogut, edhe në situatën e tensioneve të rritura politike dhe të sigurisë, sidomos për serbët e Kosovës", tha Vuçiq në një takim me udhëheqësin e një delegacioni të Parlamentit Evropian, Eduard Kukan, të hënën në Beograd.
Siç raporton Shërbimi i Ballkanit i Radios Evropa e Lirë, Vuçiq e informoi Kukanin për arsyet e ndërprerjes së dialogut me Prishtinën, duke thënë se kjo e fundit nuk i ka përmbushur detyrimet e përcaktuara me Marrëveshjen e Brukselit, sidomos rreth formimit të Asociacionit të komunave me shumicë serbe.
Vuçiq thuhet se shprehu shqetësimet e tij me synimin e Prishtinës për formimin e ushtrisë së Kosovës dhe tha se një gjë e tillë do të destabilizojë situatën në rajon.
Vuçiq po ashtu tha se anëtarësimi i vendit të tij në Bashkimin Evropian paraqet prioritet në poltikën e jashtme të Serbisë.
Kukan, në anën tjetër, vlerësoi, siç tha ai, përparimin ekonomik të Serbisë dhe tha se investitorët e huaj janë të kënaqur me klimën e biznesit në Serbi.
