“Hija e vetes” duket një term i zakonshëm, por nuk i referohemi kuptimit të parë të fjalës
Termi është krijuar nga psikiatri dhe psikoanalisti Carl Jung.
Pjesët e vetes që duam t’i shtypim ose t’i fshehim fare janë ato që ndryshe njihen si hije. Në vend që njerëzit të mohojnë ekzistencën e “hijes së vetes”, duhen gjetur mekanizmat për të punuar me veten, për të menaxhuar më mirë raportet dhe ndjenjat, qoftë edhe ato negative.
Çfarë është ekzaktësisht “hija e vetes”?
Ky përcaktim i referohet gjërave rreth vetes që ne i shtypim ose nuk na pëlqen t’i pranojmë.
Psikologia Jenn Kennedy shpjegon: “Ne priremi të gjykojmë, kritikojmë dhe turpërojmë veten me mendime të caktuara që dalin jashtë një skeme normale dhe pozitive. Ky është versioni i vetes apo hija që i prezantojmë të tjerëve”, shkruan PureWow.
Psikologët thonë se njerëzit duhet të punojnë në këtë aspekt sepse kjo krijon më shumë tolerancë dhe vetëpranim për pjesët që nuk na pëlqejnë.
Le të supozojmë faktin që kur keni qenë fëmijë ju kanë bullizuar, por si një person tepër i/e ndjeshëm, ju i keni shtypur emocionet dhe nuk jeni përballur me situatën. Duke përqafuar anën tuaj emocionale, pra atë pjesën e hijes së brendshme, ju kësisoj keni punuar ndaj paragjykimeve të të tjerëve, ndonëse nuk i keni dhënë zë emocioneve.
Të punuarit me ‘hijen e vetes’ mund të bëhet në mënyra të ndryshme. Së pari, mund të kërkoni një terapist ose një profesionist të shëndetit mendor, i cili mund t’ju ndihmojë të përvetësoni modele sjelljeje të reja që nxjerrin në pah potencialin tuaj të plotë. Ju mund ta bëni këtë edhe duke reflektuar, medituar, duke shkruar në një ditar, etj.
Ja disa pyetje që mund t’i shtroni vetes:
▪ Sa ngjaj unë me prindërit e mi në mënyrën si po i rris dhe edukoj fëmijët? Si mund të jem një version më i mirë se ata?
▪ Cilat pjesë të jetës sime më pëlqejnë dhe cilat dua t’i shmang?
▪ Kur ishte hera e fundit që u ndjeva xheloz/e për dikë?
▪ Cilat nga ëndrrat e mia janë të realizueshme dhe cilat të pamundura?
▪ Kur ishte hera e fundit që i fala një gabim vetes?
Të ‘ulesh’ me mendimet negative dhe tiparet që mund të mos na pëlqejnë tek vetja duket e vështirë, por ky është një hap i rëndësishëm drejt përqafimit të hijes sonë.
