Më ka telefonuar që të më urojë, njëjtë siç kanë vërë edhe liderë të tjerë, tha kryeministri grek pas ratifikimit të Marrëveshjes së Prespës në Parlamentin grek, duke u përgjigjur në pyetjen e gazetarëve nëse ka biseduar me kolegun e tij maqedonas, Zoran Zaev, njofton korrespondentja e M.I.A-s nga Athina.
Në deklaratën, Aleksis Cipras, e përsëriti atë që paraprakisht e shkroi në profilin e tij zyrtar në Tuiter se sot është ditë historike për Greqinë, sepse “i jepet fund një problemi të madh të pazgjidhur, që i ka peshuar politikës së jashtme”, por është ditë historike edhe për Ballkanin.
Tha se “sot lindi një vend i ri në kufirin verior, Maqedonia e veriut, e cila do të jetë vend mik dhe aleat i Greqisë”.
“Dua t’u drejtohem të gjithë grekëve dhe grekeve. Rezultati i votimit të sotëm nuk ka fitues as humbës. Sidomos, dua t’u drejtohem atyre të cilët ende kanë ankesa, e respektojmë këtë, kritikojnë, e respektojmë edhe këtë të jenë të sigurt se shumë shpejt do t’i shohin përfitimet e mëdha nga ky hap i madh përpara”, tha Cipras, transmeton MEDIAL.
Në deklaratën për mediat, kryeministri grek iu falënderua të gjithë deputetëve që e mbështetën ratifikimin, duke thënë se “gjeneratat e ardhshme të dy kombeve do ju jenë mirënjohës sepse sot i vendosin themelet për të ardhme të bashkëjetesës së qetë, solidaritetit dhe bashkëpunimit”.
