Propozim ligji për amnistinë e personave të dyshuar, të akuzuar dhe të dënuar për ngjarjet e 27 prillit të vitit 2017 në Kuvendin e Maqedonisë, të parashtruar nga VMRO-DPMNE-ja, nuk fitoi shumicën e duhur që të vendoset në rendin e ditës më seancën e 66-të plenare të Kuvendit.
Paraprakisht Nevenka Stamenkovska nga VMRO-DPMNE-ja tha se me këtë propozim ligj përfshihen të gjithë personat për të cilët tashmë është marrë vendim gjyqësor i shkallës së parë, por ende nuk është marrë vendimi nga gjykata, si dhe personat që përndiqen për rrezikim terrorist të rendit kushtetues të RM-së dhe personat që janë përfshirë me akuzë për pjesëmarrje në turmë etj.
“Ligji parashikon pajtim kombëtar për të gjithë që morën pjesë në ngjarjet e 27 prillit, e jo pajtim selektiv siç dëshiron të bëjë kryeministri Zaev dhe shumica parlamentare përmes të ashtuquajturit Komision për Pajtim”, tha Stamenkovska duke i ftuar të gjithë deputetët e shumicës parlamentare të japin përkrahjen për ligjin për amnisti dhe përfundimisht të përfundojnë ndarjet në shoqërinë e Maqedonisë duke e kthyer vendin në rrugën normale dhe duke u përqendruar në problemet e vërteta të cilat i shqetësojnë qytetarët.
Nuk ishte pranuar as propozimi i Nikolla Micevskit, koordinatorit të grupit parlamentar të VMRO-DPMNE-së për tërheqjen e Ligjit për tatimin e të ardhurave personale dhe Ligjit për kontribute nga sigurimi i përbashkët social, me procedurë të shkurtuar.
Mes pikave të tjera të kësaj seance janë edhe Propozim ligji për plotësim dhe ndryshimin e Ligjit për preparate veterinare-mjekësore në lexim të dytë, Propozim ligji për furnizime publike, si dhe ndryshimet dhe plotësimet e Ligjit për ilaçe dhe mjete mjekësore, Ligji për mbrojtje shëndetësore, Ligji për standardin e nxënësve dhe Ligjin për automjete, të gjitha në lexim të parë.