Ditë më parë qeveria e Republikës së Kosovës ka themeluar Fondin e Sigurisë.
Kryeministri Albin Kurti ka deklaruar se në përputhje me nevojat e Forcave të Sigurisë së Kosovës, situatës aktuale dhe pas konsultimeve me partnerët ndërkombëtarë, ka autorizuar Ministrinë e Financave për themelimin e “Fondit të Sigurisë”.
“Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës së Kosovës. Funksionimi i këtij fondi do të rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria”, ka thënë kryeministri.
Kurti është shprehur se në përputhje me legjislacionin në fuqi do të zbatohen procedurat për prejardhjen e mjeteve financiare me qëllim të ruajtjes së integritetit të fondit dhe qëllimit të tij.
Ai ka ftuar qytetarët e Kosovës dhe bashkatdhetarët në diasporë, por edhe donatorë të tjerë të kontribuojnë për sigurinë shtetërore.
Ditë më parë qeveria e Republikës së Kosovës ka themeluar Fondin e Sigurisë.
Kryeministri Albin Kurti ka deklaruar se në përputhje me nevojat e Forcave të Sigurisë së Kosovës, situatës aktuale dhe pas konsultimeve me partnerët ndërkombëtarë, ka autorizuar Ministrinë e Financave për themelimin e “Fondit të Sigurisë”.
“Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës së Kosovës. Funksionimi i këtij fondi do të rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria”, ka thënë kryeministri.
Kurti është shprehur se në përputhje me legjislacionin në fuqi do të zbatohen procedurat për prejardhjen e mjeteve financiare me qëllim të ruajtjes së integritetit të fondit dhe qëllimit të tij.
Ai ka ftuar qytetarët e Kosovës dhe bashkatdhetarët në diasporë, por edhe donatorë të tjerë të kontribuojnë për sigurinë shtetërore.
Ideja për hapjen e një fondi të sigurisë ishte e kamotshme, ndërsa tani me luftën Rusi-Ukrainë, që është duke u zhvilluar në Ukrainë po konsiderohet e domosdoshme që Kosova të jetë e forcuar ushtarakisht.
Një rrezik i vërtetë për Kosovën buron nga Serbia, si aleate e Rusisë.
Deputeti i Lëvizjes Vetëvendosje Haki Abazi në një emision televiziv ka deklaruar se Serbisë nuk i besohet duke qenë se është partnere e Rusisë. Sipas tij, nuk përjashtohet mundësia që Serbia të marrë detyra nga Rusia.
“Serbia është një partner i Rusisë, dhe shpesh i kopjon dhe i koordinon veprimet me të. Serbia nuk është shtet që mund t’i besohet dhe ka filluar 5 luftëra, e ka kryer gjenocid në Bosnje e Kosovë. Gjendja e shtetit të Kosovës është krejt tjetër prej asaj që ka qenë. Nuk mund të përjashtohet se merr detyra nga Rusia”, ka thënë ai.
“Por, tani mendoj, se nëse ndonjëherë kemi qenë të unifikuar, jemi sot”, përfundoi ai.
Në fakt i vetmi medium, që ka shkruar që nga fillimi i krizës në Ukrainë në vitin e kaluar, për hapjen e një fondi për investime në armatim, ishte “Bota sot”.
Hapja e Fondit të sigurisë është mirëpritur në opinion, ndonëse Kosova nuk e ka një përvojë pozitive me iniciativa të tilla, kujto këtu “fondin 3%” dhe “ Vendlindja thërret” të krijuara gjatë luftës.
Mehaj: FSK të fuqizohet me teknikë luftarake
Njohësi i çështjeve të sigurisë dhe inteligjencës Xhevat Mehaj, thotë për gazetën “Bota sot” se fondi i themeluar për siguri është veprim i duhur i Qeverisë duke u bazuar në faktin se FSK-ja ka qenë e nënfinancuar nga qeveritë e kaluara.
“Themelimin nga Qeveria të fondit për siguri e konsideroj si veprim të duhur, nuk e kuptoj si veprim paniku se duhet me urgjencë FSK-ja të fuqizohet me teknikë luftarake. Janë dy arsye themelore:
1) FSK për mendimin tim në vitet e kaluara ka qenë e nën-financuar, ka pasur më pak buxhet se sa është dashur të ketë. Ky fond pres që të kompensojë këtë mungesë nga e shkuara.
2) Nevojat e FSK-së për ngritje të kapaciteteve janë në rritje, dhe kjo kërkon buxhet më të madh se sa projektimet e deritanishme”, ka potencuar Meha.
Ai ka potencuar se FSK-ja ka ngritur kapacitetet njerëzore dhe është avancuar në stërvitje të kuadrove, derisa tash i duhet ngritja e teknikës luftarake.
Stërvitjet e kuadrove, ngritja e kapaciteteve njerëzore ka avancuar bukur shumë si rezultat i mbështetjes nga vendet mbështetëse të Pavarësisë së Kosovës. Kjo arritje e kapaciteteve njerëzore duhet që të përcillet edhe me ngritjen e nivelit të kapaciteteve të teknikes luftarake.
Problemi i buxhetit për Forcat e Sigurisë së shtetit
Ndërkaq, për Hafir Hoxhën, ish komandant për një kohë, i njësitit të policisë ushtarake të UÇK-së, mënyra e formimit dhe synimi i këtij fondi tregon se ende nuk jemi shtet stabil dhe se nuk funksionojmë si shtet.
“Kjo mënyrë e krijimit të fondeve për situata emergjente të jashtëzakonshme, pra në raste të fatkeqësive natyrore apo në ato të shkaktuara nga faktori njeri janë fonde afatshkurtra.
Për fat të keq ne ende po vazhdojmë edhe në gjendjen normale të bëjmë fonde emergjente për synime të projekteve normale të shtetit, që duhet të bëhen me rregulla dhe ligje të përhershme siç është tani problemi i buxhetit për Forcat e Sigurisë së shtetit”, thotë Hoxha.
Fondet e keqpërdorura
Ai po ashtu ka rikujtuar dy fondet e luftës në Kosovë për të cilat thotë se nuk u dha llogari asnjëherë si funksionuan dhe ku shkuan mjetet.
“Para luftës është dashur të formohen fonde pasi nuk kishim institucione dhe formonim ushtri, hynim në luftë. Aty u bënë dy fonde për shkak të mos unitetit të shqiptarëve, ishte fondi i 3% , disa të tjerë dolën e formuan fondin “Vendlindja thërret”. Të dyja u mbushën nga qytetarët tanë, u shpenzuan gjatë dhe pas luftës dhe kurrë askush ende nuk dha llogari si janë shpenzuar ato mjete, kur të gjithë kemi fakte se janë keqpërdorur shumë, pasi nga të dyja fondet sot kemi shumë individ milionerë e që kishin qasje në ato fonde”, potencon ai.
Po ashtu, ai ka rikujtuar një fond për Mitrovicën dhe një tjetër për ish-TMK-në, tani FSK-në që sipas tij nuk rezultuan aq të suksesshme.
“Më vonë u formua fondi emergjent “Ndihma për Mitrovicën”, po ashtu kurrë nuk morëm vesh sa u mblodhën, sa dhe ku u shpenzuan.
“Ishte fondi “Miqtë e TMK-së”, po ashtu kurrë askush, askund nuk ka treguar, as nuk ka dhënë llogari se sa mjete janë grumbulluar dhe si janë shpenzuar ato!”, ka shtuar ai. “Pas këtyre fondeve rregullisht rriten milionerët e rinj në politiken e Kosovës!”
Për këtë arsye, Hoxha thotë se për ndihmën e FSK-së është më mirë të përdoren institucionet dhe taksapaguesit.
“Pra, në bazë të traditës tonë ashtu do të ndodhë edhe në këtë fondin vullnetar, humanitar për Mbrojtjen e vendit, tani kur i kemi institucionet, kur vendi mbrohet me fond të rregullt, me obligime të qytetarëve të paguajnë sa u takon për sigurinë e shtetit e jo në këtë mënyrë.
Pasi kemi nevojë për atë buxhet, shoh rrezik të situatës, jam për të grumbulluar mjete, pra tani ti quajmë emergjente, por kjo mënyrë duhet të ndërpritet, duhet shteti, institucionet t`i gjejnë burimet e sigurta, stabile, obligative për sistemin e mbrojtjes e jo kjo që është të mbetet në rangun e shoqatave humanitare vullnetare”, potencon ai.
Situata e jashtëzakonshme
Kurse, juristi Muhamet Kelmendi, konsideron se fondi është i domosdoshëm për të ndërtuar një ushtri të aftë në Kosovë.
“Fondet ku nuk funksionon shteti në nivel apo shteti vet nuk ka mundësi për të financuar fushat e veta, themelohen fonde të veçanta.
Kosova i ka pasur dy fonde. Nga ato dy fonde ende nuk është raportuar dhe juridikisht nuk janë të mbyllura. Mendimet e qytetareve mbi ato fonde janë negative.
Megjithatë, koha është e jashtëzakonshme.
Agresioni rus ndaj Ukrainës qiti në dritë shumë dobësi në kuadër të të gjitha shteteve, së këndejmi edhe në Kosovë.
Për me tepër, Kosova ka vështirësi të shumta financiare. Si e tillë nuk qe në gjendje për të ndërtuar një forcë të suksesshme mbrojtëse”, thotë Kelmendi për “Bota sot”.
Ai theksuar se FSK-ja është ende larg nivelit që të jetë në gjendje vetëm për vetëm për të mbrojtur Kosovën nga sulmet e jashtme.
“Republika e Kosovës është më së keqi në fushën e mbrojtjes. Kosovës i mungojnë financat për të furnizuar FSK-në me armë mbrojtëse.
Po kështu, rreziku po thellohet.
Serbia nuk ka hequr dorë nga pretendimet territoriale mbi Kosovën. Ajo po armatoset dhe po përgatitet për të vepruar kundër Republikës.
Po e pret momentin për të sulmuar Kosovën ushtarakisht dhe për të pushtuar.
Kosova gjendet nën mbrojtjen e KFOR-it. Por, NATO-ja ka ballafaqime të tjera. Republika është e mbrojtur dobët.
FSK-së i duhen mjete. Me mjetet financiare të Republikës nuk ndërtohet një ushtri e aftë mbrojtëse. Duhen më shumë mjete financiare për FSK-në”, nënvizoi Kelmendi.
Agresioni rus në Ukrainë po tregon se pa ushtri të armatosur nuk ka siguri shteti dhe populli. “Fondin për Siguri” Kelmendi e konsideron si ndihmë të madhe duke shfaqur shpresën se qytetarët do të ndihmojnë.
“Këtu është një ndihmë e madhe "Fondi për Siguri". Shpresoj dhe qytetarët do të kontribuojnë në këtë fond. Agresioni rus në Ukrainë po tregon se pa ushtri të armatosur nuk ka siguri shteti dhe populli. Këtë e kanë parë dhe po e shohin qytetarët e Republikës. Si brenda, ashtu edhe jashtë, kontributi nuk do të mungojë. E përbashkëta është kontributi. E kjo kërkon përkujdesje dhe menaxhim të mirë”, është shprehur ai.
Nga ana tjetër profesori Kelmendi thotë se i takon Qeverisë ta përgatis ligjin për "Fondin për Siguri" dhe në bazë të ligjit të veprohet me Fond.
“Kjo, edhe më shumë, kur dihen akuzat dhe mendimet për fondet në të kaluarën. Këtej kërkohet menaxhim dhe shfrytëzim i fondit vetëm për siguri.
Me këtë rritet besimi dhe me besim rriten edhe kontributet e qytetarëve tanë”, përfundon Kelmendi.