Të dielën në Kosovë do të mbahet “Marshi për Drejtësi”, marsh ky në përkrahje të Hashim Thaçit, Kadri Veselit, Rexhep Selimit, Jakup Krasniqit e të tjerëve, të cilët, nga Gjykata Speciale akuzohen edhe për vrasjen e shqiptarëve, anëtarë të LDK-së dhe bashkëpunëtorë të presidentit historik, Ibrahim Rugova.
E në mbështetje të këtij marshi, përveç disa partive dhe organizatave të ndryshme në Kosovë, sot ka dalë edhe ish kryetari i LDK-së, Isa Mustafa, ani pse dikur ishte pikërisht Mustafa që i akuzonte për vrasjen e anëtarëve të LDK-së Thaçin, Veselin e strukturën e ShIK-ut.
“Marshojmë për Drejtësi”, një manifestim që meriton përkrahje e solidarizim! Meriton respekt e përkrahje lufta e UÇK-së dhe meritojnë drejtësi luftëtarët e saj që dolën në ballë për të ndalur masakrat e shtetit serb dhe gjenocidin ndaj shqiptarëve. Kosova sot është e lirë falë luftës së UÇK-së, mençurisë politike të Ibrahim Rugovës dhe ndërhyrjes së NATO-s. Kemi qenë bashkë në kohërat më të vështira; jemi solidarë sot me të gjithë ata që kontribuan për liri e pavarësi dhe me ata që ishin shembull i gatishmërisë për të zbardhur çdo dyshim në luftën e drejtë dhe të pastër, sepse besonin në Drejtësi! Me mendje jam me ju që do të marshoni për Drejtësi”, ka shkruar Isa Mustafa në reagimin e tij në facebook.
Por kundër këtij marshi ka dalë analisti politik, Nexhat Haziri, sipas të cilit, ky marsh po organizohet më shumë për poenë politikë nga PDK-ja.
“Drejtësia nuk bëhet përmes rrugëve, protestave dhe marsheve, por përmes sistemit të drejtësisë, një drejtësie të pavarur dhe të pandikuar nga politike, dhe mungesa e saj është rezultat i themelimit të Gjykatës Speciale, pra një domosdoshmëri. Marshi i së dielës, gjoja në emër të drejtësisë, i thirrur nga PDK-ja dhe mbështetur nga të gjitha subjektet politike të ashtuquajtura "krahu u luftës", është diçka që bëhet nga PDK-ja më shumë për poenë politikë dhe për ta ngritur rajtingun e saj politik, se sa që ka ndonjë ndikim në punën e Gjykatës Speciale, e cila është gjykatë që është themeluar nga vet Kosova”, shprehet Haziri.
Siç thotë ai, ndërhyrja në drejtësi e dëmton rëndë imazhin e Kosovës.
“Kjo nuk është një imazh i mirë i politikës, pasi ndërhyrja në drejtësi dëmton Kosovën në sytë e opinionit ndërkombëtar, një gjë që nuk duhej të ndodhte. Ata që e kanë përcjellur procesin gjyqësor në të cilin është dënuar Sali Mustafa i ashtuquajturi Komandant Cali dhe tani procesi që po zhvillohet ndaj Pjetër Shalës, atëherë çdo qytetar në vendin tonë e kupton se e rëndësishme është drejtësia për një shoqëri normale e që ka ambicie për integrime euro-atlantike”, thekson Haziri.
Ani pse nuk e përmend me emër, Haziri deklaron se në Gjykatën Speciale është i dyshuari kryesor për vrasjen e Xhemail Mustafës dhe vrasjet tjera që kanë ndodhur në LDK.
“Nuk mund të ndërtohet e ardhmja e Kosovës si vend demokratik, ku sundon rendi dhe ligji pa zbardhjen e vrasjeve politike, gjatë dhe pas periudhës së luftës, të aktivistëve dhe zyrtarëve të lartë të LDK-së, bashkëpunëtorëve të Presidentit historik të Kosovës, dr. Ibrahim Rugova, pasi çdo krim i pandëshkuar është rrezik potencial që ai të përsëritet. Nuk duhet harruar dhe nuk duhet të mbyllen sytë se në Gjykatën e Hagës gjendet i dyshuari kryesor për vrasjen e Xhemail Mustafës, dhe poashtu janë dosjet e shumë zyrtarëve të tjerë të vrarë të LDK-së e që duhet zbardhur, por edhe viktimave të tjera civile”, shprehet Haziri për “Bota sot”.
Më tej, Haziri lidhur me përkrahjen që Isa Mustafa i ka dhënë marshit të 2 prillit, thotë se kjo është një thirrje absurde.
“Ndërsa sa i përket asaj që ish-kreu i LDK-së Isa Mustafa i ka dhënë mbështetje protestës së të shtunës, është absurde pasi vet Mustafa sa ishte aktiv në politikë dhe në krye të LDK-së kërkonte zbardhjen e vrasjeve të Kol. Ahmet Krasniqit, Enver Malokut, Xhamajl Mustafës, Shaban Manajt, Smajl Hajdarajt e të tjerëve. Dhe të gjithë këta dhe të tjerët nuk i ka vra "reja", ashtu sic nuk e ka vra "reja" gazetarin Ismail Berbatovcin, Shefki Popovën, Ismet Rracin e të të tjerë, por janë vra për qëllime politike dhe për pushtet. Andaj nuk e di kur ka qenë i vërtetë z. Mustafa, atëherë kur kërkonte zbardhjen e vrasjeve politike, apo tani kur jep mbështetje një proteste që ka për qëllim ndërhyrje në drejtësi”, përfundon për “Bota sot”, analisti politik Nexhat Haziri.
