(E plotësuar) - Pasditen e sotme një zjarr përfshiu bodrumin e ministrisë së Punëve të Brendshme.
Në lidhje me ngjarjen policia e Tiranës bën me dije se nga zjarri është dëmtuar vetëm një stabilizator energjie.
“Rreth orës 20:45 në bodrumin e godinës së Ministrisë së Brendshme, Shërbimet e Sigurisë konstatuan tym.
Shërbimet ndërhynë menjëherë duke shkëputur energjinë elektrike.
Rezulton se është dëmtuar vetëm një stabilizator i energjisë elektrike.
Ekspertët po punojnë për të përcaktuar shkaqet.
Informojmë gjithashtu se të gjitha sistemet janë funksionale dhe pa asnjë problem apo dëmtim, gjithçka funksionon normalisht”, njofton policia.
***
Mbrëmjen e sotme ka rënë një zjarr në bodrumin e Ministrisë së Brendshme.
Ngjarja është shënuar rreth orës 20:30 minuta.
Burime për Shqiptarja.com pohojnë se vatra e zjarrit ka qenë afër dhomave të serverit të sistemit TIMS.
Sipas të dhënave të para mësohet se zjarri është shkaktuar nga disa kabuj elektrik si pasojë e një defekti.
Flakët janë shuar pas ndërhyrjes me shpejtësi të zjarrfikëses, ndërsa nuk dihet ende për dëmet që ka shkaktuar.