Shkrimtarja e njohur, që jeton në Holandë, Flutura Açka, përmes një poezi të shkurtër të postuar në Facebook-un e saj tregon diferencën mes qytetit Ringvaartaquaduct në Holandë dhe Tiranës së pushtuar nga ndërtimet.
“Pse nuk hapin një panair betonieresh me rastin e 100 vjetorit të kryeqytetit më të ngulfatur të Europës?“, pyet shkrimtarja.
Postimi i plotë:
Vjeshtë në Ringvaartaquaduct, Holandë
Se si i kalon vijat e bardha uji mbi autostradë, mos më pyesni.
Se si t’i numëroj kantieret e betonit në Tiranë që s’na lënë kund me kalu, po.
Ku i gjejnë lekët vallë në këto kohë varfërie ekstreme të botës?
Gjithçka është mpirë, veç ndotjes ajrore, psikike, akustike dhe euro-stike e Tiranës!
Pse nuk hapin një panair betonieresh me rastin e 100 vjetorit të kryeqytetit më të ngulfatur të Europës?
Gjatë fushatës elektorale të vitin 2015, kryebashkiaku i Tiranës Erion Veliaj do të premtonte se nuk do të jepte asnjë leje ndërtimi klienteliste, por sot pas më shumë se 4 vjetësh në krye që kryeqytetit ndërtimi po lulëzon kudo nëpër Tiranë.
Por nën “maskën” e masterplanit të ri “Tirana 2030”, sheshi Skënderbej do të jetë tërësisht i rrethuar me kulla të larta, dhjetë të tilla, dhe praktikisht do të shërbejë si oborri i këtyre ndërtesave private.