Ministri i Brendshëm Taulant Balla deklaron se armëmbajtja pa leje do të goditet edhe më ashpër dhe është prioritet në punën e përditshme të Policisë.
“Armëmbajtja pa leje po goditet çdo ditë. Do të bëjmë gjithçka, me më shumë angazhim sesa më parë, që ky karshillëk i hapur ndaj ligjit dhe shoqërisë sonë të luftohet nga Policia e Shtetit me vendosmëri”, shkruan Ministri Balla, teksa postoi në rrjetet sociale pamje nga operacioni policor në Vlorë.
Një 38-vjeçar, që sapo kishte ardhur në Vlorë u konstatua nga shërbimet e Komisariatit, në bashkëpunim me Forcën e Posaçme Operacionale. Ato organizuan dhe finalizuan operacionin policor të koduar “Mysafiri”, si rezultat i të cilit u arrestua në flagrancë i riu nga Tirana. Gjatë kontrollit fizik iu gjet në qese plastike, një armë zjarri pistoletë të llojit “Beretta” dhe një krehër për pistoletën.
