Komiteti Olimpik i Kosovës (KOK) nënshkroi kontratat me 32 bursistë “Shpresa Olimpike 2023”, të cilët do të mbështeten nga KOK-u.
Sportistët të cilët janë përfitues të kësaj burse i takojnë moshave 14-21 vjeç, dhe do jenë përfitues të 150 eurove në muaj gjatë tërë këtij viti.
Pas nënshkrimit të kontratave foli presidenti i KOK-ut, Ismet Krasniqi, i cili tregoi se numri i bursistëve është rritur nga 25 në 32.
“Bursistët, që vijnë nga 17 federata sportive olimpike, janë përzgjedhur nga komisioni i sportit, ndërsa të gjithë këta vlerësohen që kanë potencial për të ardhmen”, tha Krasniqi.
Në emër të federatave, kryetari i Federatës së Mundjes së Kosovës, Naim Muja, shprehu mirënjohjen e tij për mbështetjen e vazhdueshme të KOK-ut, duke thënë se sportistët duhet të punojnë shumë, në mënyrë që të shpërblejnë mbështetjen e KOK-ut.
Në anën tjetër, në emër të sportistëve, foli skitarja Lirika Deva, e cila falënderoi KOK-un për mbështetje, derisa shpreson që bursa do t’iu ndihmojë për përgatitje dhe gara.
