Deputeti i Partisë Demokratike të Kosovës, Bekim Haxhiu ka thënë se raportimet se gjoja Kadri Veseli do të intervistohet nga Gjykata Speciale janë tendencioze.
Sipas tij, ky veprim është bërë pasi shefi i PDK-së inicioi formimin e një Tribunali që do të gjykojë krimet që ka kryer shteti i Serbisë gjatë luftës së fundit në Kosovë.
“Unë mendojë se s’ia vlen me komentu shpifje të nivelit të tillë. Kërkim falja e atyre është çëshjte morale dhe etike”, është shprehur Haxhiu.
Deputeti, i njohur si Kamishi, thotë se është befasuar se si disa në Kosovë shpifën rreth këtij rasti. Mirëpo, Haxhiu nuk befasohet nga qëndrimet e Beogradit karshi kryetarit të Kuvendit të Kosovës.
“Pas iniciativës për krijimin e Gjykatës Ndërkombëtare për krimet serbe në Kosovë dhe momentin që i adresohemi Parlamentit Evropian për nxjerrjen e një rezolute… kukavajtat vazhduan të shpifin. Unë e di që janë shqetësu kriminelët serbë, por jo edhe në Kosovë”, është shprehur ai për “Indeksonline”.
Ndryshe, në disa mediume dje u raportua se Veseli dje është intervistuar nga Specialja. Ndërsa, ky i fundit hodhi poshtë këto raportime duke thënë se ka udhëtuar për në Lublanë rreth çështjes së doktoraturës së tij.