Kryeministri i Kosovës, Ramush Haradinaj ka pritur në takim vartësin e tij, Fatmir Limajn, me të cilin tha se ka biseduar për seancën e së enjtes, kur pritet të shpërndahet Kuvendi i Kosovës dhe për koalicionet parazgjedhore. Haradinaj, i cili një muaj më parë dha dorëheqje nga posti i shefit të Qeverisë, pas takimit me kryetarin e Nismës Socialdemokrate, tha se ka vullnet dypalësh për bashkëpunim të mëtejmë me Limajn.
Pasi ka nënshkruar marrëveshjen parazgjedhore me partinë e Shpend Ahmetit, lideri i Aleancës për Ardhmërinë e Kosovës, Ramush Haradinaj bisedoi edhe me Fatmir Limajn.
Pas takimit, që u mbajt në ndërtesë ne Qeverisë, Haradinaj tha se kishin një bisedë përmbajtjesore por që nuk kanë kaluar në fazën e një koalicioni mes tyre. Por, tha se ka një traditë bashkëpunimi dhe vullneti është dypalësh.
Haradinaj: Ekziston vullnet dypalësh për bashkëpunim me Nismën
“E kam informuar me marrëveshjen që kemi arrit më PSD-në dhe ai më uroi, pastaj kemi diskutuar për proceset që na presin deri në zgjedhje, pak a shumë jemi fokusuar edhe të shpërbërja e Kuvendit, të enjten, dhe punë të tjera. Por nuk kemi kaluar në fazën e një koalicioni mes neve, por një traditë e bashkëpunimit ekziston por nuk e kemi zbërthyer…. Vullneti është dypalësh, nëse realizohet, realizohet”, tha ai.
I pyetur për kritikat e Vetëvendosjes për koalicionin AAK-PSD, Haradinaj tha se është humbje për Vetëvendosjen që PSD ka zgjedh të bashkëpunojë me Aleancën dhe jo me ata.
Haradinaj: Koalicioni AAK-PSD pjekuri politike
“Është humbje për Vetëvendosjen fakti që një pjesë e kolegëve të tyre në vend që me ribashkpunu me ta, paskan zgjedh për partner Aleancën për ardhmërinë e Kosovës. Unë i jam mirënjohjes kryetarit Ahmeti dhe PSD-së, vërtetë është një pjekuri politike kjo që ka ndodh dje dhe shpresë për qytetarët e vendit, kritikat janë, jemi në fushatë, do të ketë kritika, ka pak edhe xhelozi dhe është normal”, tha ai.
E për Nismën, Haradinaj tha se nuk sheh ndonjë pengesë që marrëdhëniet mes tyre, që sipas tij janë traditë, të zbatohen edhe në të ardhmen.
