Lëvizja e Vetëvendosje dhe Lidhja Demokratike e Kosovës kanë përfunduar edhe takimin e sotëm pa bërë publike marrëveshjen për Qeverinë e re, mirëpo kanë pranuar se ka avancim.
E për këtë avancim shkruajti edhe media duke treguar se thuajse gjithçka është vendosur dhe pritet vetëm konfirmimi i tyre në organet e partive.
Organet e partive, në anën tjetër, janë bërë gati të mblidhen nesër për të vendosur për emrat e ministrave. Takimi i LDK-së do të mbahet nesër në orën 11:00, ndërkaq i VV-së akoma nuk është konfirmuar detajisht.
Siç thonë burimet nga brenda takimit, VV e LDK do të diskutojnë në organet e tyre partiake marrëveshjen e arritur dhe pritet që aty t’i jepet vula koalicionit.
Ndër të tjera, pikë për diskutim është edhe posti i presidentit, për të cilën gjë do të vendos Këshilli i Përgjithshëm i VV-së, ani pse ai do t’i takojë LDK-së. Kjo, në fakt, ishte kushti i Albin Kurtit për t’ia dhënë këtë post partisë aleate.
Ndryshe, vlen te theksohet se VV e LDK janë gati ta bëjnë Qeverinë më 12 ministri, që parasheh ndarje të barabartë pushteti në mes këtyre të dyja partive.