Gazetari dhe ish-deputeti, Milaim Zeka, ka thënë në emisionin Pressing se aktakuzat e para nga Gjykata Speciale janë shtyrë për shkak të zgjedhjeve parlamentare në Kosovë.
Zeka i tha këto komente, përkundër se mbrëmë avokati, Arianit Koci, tha se Specialja nuk i përcjell fare zhvillimet politike në vend dhe punon e pavarur.
“Për shkak të zgjedhjeve u shtyn aktakuzat e Speciales”, tha Zeka.
Media ka raportuar se Zyra e Prokurorit të Specializuar i ka dërguar aktakuzat e para në Gjykatë por përmbajtja e tyre është sekrete.
Pesë vite pas themelimit, kjo prokurori ka dorëzuar aktakuzat e para ndaj ish pjesëtarëve të Ushtrisë Çlirimtare të Kosovës.
Për këtë gjë, ka njoftuar vet zyra e Prokurorit të Specializuar.
“Prokurori i Specializuar ka njoftuar Kryetaren e Dhomave të Specializuara të Kosovës se ka ndërmend të fillojë me procedime penale para Dhomave të Specializuar dhe ka bërë kërkesë për caktimin e një gjyqtari të procedurës paraprake në pajtim me Ligjin”
Kërkesën e Zyrës së Prokurorit të Specializuar e ka aprovuar kryetarja e Dhomave të Specializuar, Ekaterina Trendafillova.
Ndërkohë, përmbajta e aktakuzave mbetet sekrete deri sa të konfirmohen nga gjykatësi i procedurës paraprake.
Specialja ishte krijuar në vitin 2015 dhe ka intervistuar më shumë se 200 persona deri tani.
